वीरगन्ज,१४ पुसः जनता समाजवादी पार्टी (जसपा) र जनता समाजवादी पार्टी (जसपा) नेपालबीच पार्टी एकता भएको छ ।जसपाका सहअध्यक्ष रेणु यादव र उपमहासचिव प्रदीप यादवसहित बहुमत केन्द्रिय सदस्यहरुले उपेन्द्र यादव अध्यक्ष रहेको जसपा नेपालसंग पार्टी एकता गरेका हुन् ।
यसअघि आइतबारमात्रै महन्थ ठाकुर नेतृत्वको लोकतान्त्रिक समाजवादी पार्टी (लोसपा)संग उपेन्द्र यादवको पार्टी जसपा नेपालले पार्टी एकता गरेको थियो । त्यसको भोलिपल्टै सोमबार जसपा र जसपा नेपालबीच एकता गरिएको हो ।
पार्टी एकताको सहमति पत्रमा जसपाकी सहअध्यक्ष रेणु यादव र जसपा नेपालका अध्यक्ष उपेन्द्र यादवले हस्ताक्षर गरेका हुन् ।
‘मिति २०८२ पुस १३ गते जनता समाजवादी पार्टी, नेपाल र जनता समाजवादी पार्टीका सह–अध्यक्ष रेणु यादवको नेतृत्वमा रहेका बहुमत केन्द्रीय सदस्यहरू सहित जसपा, नेपाल पार्टीसँग एकीकरण गरियो ‘ सहमति पत्रमा उल्लेख छ ।