वीरगन्ज, १२ फागुनःराष्ट्रिय स्वतन्त्र पार्टी (रास्वपा) बाट पर्सा निर्वाचन क्षेत्र नम्बर २ का प्रतिनिधिसभा सदस्य उम्मेदवार सुशील कुमार कानुले मंगलबार वीरगन्ज महानगरपालिका – २४ रमगढवा र वडा नं २५ सिर्सिया टोलमा घरदैलो कार्यक्रम गरेका छन् । त्यसक्रममा मतदातासंगको भेटमा उनले भ्रष्टाचार र कुशासन अन्त्य गरी नयाँ नेपाल निर्माणका लागि रास्वपालाई मतदान गर्न आग्रह गरे ।
पछिल्लो चार दशकदेखि चलिआएको राजनीतिक चक्रब्यूह तोडेर विधिको शासन स्थापना गर्ने, नेपाली जनताको जीवनस्तर उकास्ने र समृद्ध नेपाल निर्माण गर्ने लक्ष्य रास्वपाको रहेको भन्दै कानुले स्थानीय मतदातालाई रास्वपाका सबै उम्मेदवारलाई जिताउन अनुरोध गरे ।
“पर्सा देशकै महत्त्वपूर्ण जिल्ला हो, तर यहाँबाट निर्वाचित सांसद, मन्त्रीहरूले बेवास्ता गर्दा जिल्लाको विकास हुन सकेन,” कानुले भने, “शिक्षा, स्वास्थ्य, पूर्वाधार र सडकको अवस्था अत्यन्त जीर्ण छ । अघिल्ला प्रतिनिधिहरूले आफ्नो स्वार्थ पूरा गर्न मात्र लगानी गरे ।” उनले यदि आफू निर्वाचित भए रास्वपा नेतृत्वको सरकारले पर्साको कायापलट गर्ने गरी ठुला विकास योजनाहरू ल्याउने प्रतिबद्धता जनाए ।
कृषि, शिक्षा, स्वास्थ्य र पूर्वाधारलाई प्राथमिकतामा राखेर जनताको आधारभूत आवश्यकतामा केन्द्रित कार्यक्रम सञ्चालन गर्ने बताए । “स्थानीय तहदेखि सङ्घीय तहसम्म समन्वय गरी योजनाबद्ध विकास अघि बढाइनेछ,” उनले थपे ।
कृषि क्षेत्रको समस्या औँल्याउँदै कानुले किसानलाई समयमै मल उपलब्ध गराउने सुनिश्चित व्यवस्था गर्ने र युवालाई सीपमूलक तालिम दिएर स्थानीय स्तरमै रोजगारी सिर्जना गर्ने योजना सार्वजनिक गरे । “युवाले गाउँमै काम पाए भने वैदेशिक रोजगारीको बाध्यता घट्छ,” उनको भनाइ छ ।