वीरगन्ज,१२माघःपर्सा क्षेत्र नम्बर २ मा पर्ने बहुदरमाई नगरपालिका वडा नम्बर ६ भौराटारमा रास्वपा उम्मेदवार सुशीलकुमार कानुको विशेष उपस्थितीमा कार्यकर्ता भेला सम्पन्न भएको छ ।
सोमबार बेलुकी आयोजित रास्वपाको नगरपालिकास्तरीय अगुवा कार्यकर्ता भेलामा बोल्दै रास्वपा उम्मेदवार कानुले भ्रष्टचार अन्त्य र सुशासन नै रास्वपाको मुख्य एजेन्डा रहेको बताए । पुराना दलहरुकै चरम भ्रष्टचारका कारण जनताले अब देशमा युवा नेतृत्व खोजेको भन्दै कानुले आगामी निर्वाचनमा रास्वपाले भ्रष्टाचारको कुनैपनि दाग नलागेका युवाहरुलाई उम्मेदवार बनाएको बताए ।
पर्सा–२ मा पनि जनताले परिवर्तन खोजेकै कारण रास्वपाप्रति जनलहर बढेको भन्दै उनले भने,‘ जुनदिन देखि म मतदाताका बीचमा गाँउ गाँउमा गइरहेको छु, युवादेखि बुद्धासम्मले अपार माया र भरोसा देखाइरहनु भएको छ । उहाँहरुको एउटै मात्र चाहना छ पर्सा–२ मा यसपालि परिवर्तन हुनुपर्छ ।’
कानुले रास्वपा र यो दलको नेतृत्व रवि लामिछाने र बालेन शाहप्रति बढ्दो जनलहरलाई फागुन २१ को निर्वाचनसम्म कायम राख्न सम्पूर्ण कार्यकर्ता र समर्थकहरुलाई आग्रहपनि गरे ।
रास्वपाका नगर अध्यक्ष चन्दन यादवको अध्यक्षतामा भएको उक्त कार्यक्रममा रास्वपाका क्षेत्रीय सभापति, क्षेत्रीय उपसभापति, वडा स्तरका नेता लगायतकाकोपनि सहभागिता थियो ।