जनकपुरधाम,२८जेष्ठ:लोकतान्त्रिक समाजवादी पार्टी (लोसपा) नेपालका वरिष्ठ उपाध्यक्ष जितेन्द्र सोनलले मधेस केन्द्रित दलहरुलाई एकठाउँमा उभिन अपिल गरेका छन् ।
जनकपुरमा साेमबारदेखि सुरु जसपा नेपालको एकताको राष्ट्रिय महाधिवेशनको उद्घाटन सत्रलाई सम्बोधन गर्दै सोनलले मधेस केन्द्रित शक्तिमाथी पछिल्लो समय प्रहार भइरहेकाले त्यसको सामना गर्नका लागि एकठाउँमा उभिन अपिल गरे ।
पछिल्लो समय हामी कमजोर हुँदै गइरहेका छौँ, सोनलले भने ‘राजनीतिमा कमजोर वा मजबुत हुने क्रम चलिरहन्छ, पछिल्लो समय हामी कमजोर भएका छौँ, फेरी मधेसमा एउटा सशक्त राजनीतिक शक्तिको आवश्यकता छ ।’
उनले मधेसका सम्पूर्ण राजनीतिक शक्तिलाई पुनर्विचार गरी मधेस केन्द्रित दलहरूलाई सशक्त राजनीतिक शक्ति निर्माण गर्न तर्फ केन्द्रित हुन आग्रह गरे ।
सोनलले मुलुकमा संघीयता, गणतन्त्र र विभिन्न आन्दोलनबाट प्राप्त अधिकार खोस्ने षडयन्त्र तर्फ सबै सचेत हुनु आवश्यक रहेको बताए ।
उनले नेपालको प्रत्येक परिवर्तनको आन्दोलनमा मधेसको भूमिले अग्रणी भूमिका रहेकाले संघीयतालाई बचाउन मधेसका सम्पूर्ण नागरिक अन्तिम क्षणसम्म लडी रहने अठोट व्यक्त गरे ।साभार:खबरहब