वीरगन्ज,२मंसिरःवीरगन्जस्थित नापी कार्यालयका दुई कर्मचारी सेवाग्राहीसंग घुस लिएको आरोपमा पक्राउ परेका छन् । अख्तियार दुरुपयोग अनुसन्धान आयोगको टोलीले वीरगन्ज–३ स्थित नापाी कार्यालयका सर्भेक्षक –अमिन) प्रमोद राउत कुर्मी र कार्यालय सहयोगी अरुण प्रसाद उपाध्यायलाई नियन्त्रणमा लिएको हो ।
काठमाडौंको टंगालस्थित अख्तियारको केन्द्रिय कार्यालयबाट खटिएको टोलीले मंगलर वीरगन्जस्थित नापी कार्यालयबाटै दुवै जनालाई नियन्त्रणमा लिएको अख्तियारका प्रवक्ता राजेन्द्रकुमार पौडेलले जानकारी दिए ।
उनका अनुसार, राउत र उपाध्यायले छुट जग्गा दर्ता गर्नका लागि सेवाग्राहीसँग बिभिन्न बहाना बनाई १ लाख रुपैयाँ घुस मागेको सूचना अख्तियारको कार्यालयलाई प्राप्त भएको थियो । त्यहि सूचनाका आधारमा मंगलबार खटिएको अख्तियारको टोलीले सेवाग्राहीसँग १ लाख रुपैयाँ घुस लिएको अवस्थामै राउत र उपाध्यायलाई नियन्त्रणमा लिएको प्रवक्ता पौडेलले जानकारी दिए ।
नियन्त्रणमा लिइएका दुवै जनालाई अख्तियारको टोलीले काठमाडौंस्थित कार्यालयमा लिएर गएको र यसबारेमा थप अनुसन्धान भइरहेको पौडेलले बताए ।