वीरगन्ज,१३कात्तिक :मधेस प्रदेशका मुख्यमन्त्री जितेन्द्र सोनल र नेपालका लागि बेलायती राजदूतावासको विकास कार्यक्रम प्रमुख पौलिन सिनन नेतृत्वको टोलीबीच शिष्टाचार भेटघाट भएको छ । विहीबार जनकपुरमा भएको भेटका क्रममा दुई पक्षबीच विकास साझेदारी र सहकार्यका सम्भावित क्षेत्रबारे छलफल भएको मुख्यमन्त्रीको निजिी सचिवलयले जनाएको छ ।
भेटका क्रममा मुख्यमन्त्री सोनलले मधेस प्रदेश सरकारको प्राथमिकतामा शिक्षा, स्वास्थ्य र कृषि क्षेत्र रहेको बताए ।मुख्यमन्त्री सोनलले मधेस प्रदेशको समग्र विकासका लागि बेलायती दूतावासजस्ता अन्तर्राष्ट्रिय साझेदारहरूसँग सहकार्य गर्न प्रदेश सरकार पूर्णरूपमा तयार रहेको स्पष्ट पारे ।
त्यस्तै बेलायती टोलीकी प्रमुख सिननले प्रदेश सरकारका विकास प्रयासहरूमा दूतावासको तर्फबाट सहकार्य र समर्थनका लागि प्रतिबद्धता व्यक्त गरिन् । भेटघाटमा प्रदेश सरकारका उच्च अधिकारीहरूका साथै बेलायती दूतावासका प्रतिनिधिहरूको समेत उपस्थिति रहेको थियो ।