बारा,१६भदौं :बारामा मधुवन सब–डिभिजन वन कार्यालयको टोलीले ठूलो परिमाणमा सालको काठसहित एक जना तस्करलाई पक्राउ गरेको छ ।
बारामा काठ तस्करी नियन्त्रणका लागि सञ्चालन गरिएको विशेष अपरेसनका क्रममा वन कार्यालयले सालको काठसहित जीतपुरसिमरा उपमहानगरपालिका वडा नम्बर १७ रामनगर मुसहर टोलका ६७ वर्षीय रामबाबु सहनीलाई पक्राउ गरेको हो ।
सब–डिभिजन वन कार्यालय मधुवनबाट वन अधिकृत संजय कुमार चौधरीको नेतृत्वमा खटिएको टोलीले बथान टोल नजिकबाट काठसहित सहनीलाई पक्राउ गरेको डिभिजन वन कार्यालय बाराका डिभिजनल वन अधिकृत राजीव कुमार झाले जानकारी दिए ।
उनका अनुसार ५ थान सालको काठ ४६.०६ क्युफिट, ६ थान होंडा साइकल, २ थान आरा र २ थान बन्चरो बरामद गरिएको हो ।पक्राउ परेका सहनीलाई डिभिजन वन कार्यालय बाराको थुनुवा कक्षमा राखेर थप अनुसन्धान भइरहेको झाले जानकारी दिए।