वीरगन्ज,२०साउनःवीरगन्जको परोपकारी संस्था उपकार सेवा नेपालले चितवनको माडी नगरपालिका–९ गणेशकुञ्जामा रहेको राममन्दिर जेष्ठ नागरिक समूहलाई ५ थान पंखा सहयोग गरेको छ। जेष्ठ नागरिकहरूले भजनकीर्तन गर्ने स्थानमा पंखाको अभाव भएकोले सहयोगको आग्रह आएपछि उक्त संस्थाले पाँच थान प्रदान गरेको हो ।
गणेशकुञ्जस्थित राममन्दिरसँगै रहेको जेष्ठ नागरिकहरूको विश्रामस्थलमा पंखाको व्यवस्था मिलाइदिन माडी–९ का वडाअध्यक्ष धनश्याम दवाडीले आग्रह गरेपछि जेष्ठ नागरिकले गर्मीको समयमा भोग्नुपरेको असहज अवस्थालाई सहज बनाउन विभिन्न दाताबाट प्राप्त ५ थान पंखा सहयोगस्वरूप उपलब्ध गराइएको संस्थाकी अध्यक्ष सरावगीले बताइन्।
उपकार सेवा नेपाल वीरगन्जकी अध्यक्ष विद्यादेवी सरावगीले गणेश आधारभूत विद्यालयका प्रधानाध्यापक तोयनाथ अधिकारी र अयोध्यापुरी मध्यवर्ती उपभोक्ता समितिका सदस्य विष्णुप्रसाद अधिकारीलाई ती पंखाहरू हस्तान्तरण गरेकी हुन् ।
पंखा हस्तान्तरण कार्यक्रममा सामुदायिक रेडियो प्रसारक संघ नेपालका केन्द्रिय वरिष्ठ उपाध्यक्ष गोविन्द देवकोटा, समाजसेवी प्रकाश थारु, नेपाल पत्रकार महासंघ पर्साका अध्यक्ष ओमप्रकाश खनाल, रेडियो नेपालका मधेस ब्युरो प्रमुख ध्रुव अधिकारी , भानुभक्त अधिकारी लगायतकाको उपस्थिति रहेको थियो।