वीरगन्ज,१३असारःवीरगन्ज–१५ स्थित नेशनल मेडिकल कलेज तथा शिक्षण अस्पतालमा स्नातकोत्तर (पिजी) अध्ययनका लागि भर्ना भएका विद्यार्थीहरुका लागि स्वागत तथा अभिमुखीकरण कार्यक्रम सम्पन्न भएको छ । शुक्रबार कलेजकै सभाकक्षमा आयोजित कायर्यक्रममा पिजी अध्ययनका लागि भर्ना भएका ५३ वटा विद्यार्थीहरुलाई स्वागत गरिएको हो ।
कार्यक्रमको उद्घाटन गर्दै कलेजका अध्यक्ष प्राध्यापक डा. जैनुद्धिन अन्सारीले भर्ना भएका विद्यार्थीहरुलाई लगनशील र मेहनतका साथ अध्ययन गर्न सुझाए । पछिल्लो समय नेपालको चिकित्सा शिक्षा गुणस्तरीय र प्रतिष्पर्धात्मक भएको बताउँदै उनले विद्यार्थीहरुले स्नातकोत्तर तहमा झनै मेहनत गरेर अध्ययन गर्नुपर्ने बताए । आफुले ५० वर्षअघि अध्ययन गर्दाको अवस्था र अहिलेको अवस्थामा धेरै नै सुधार र फरक भइसकेको जनाउँदै प्रा.डा. अन्सारीले त्यसबेला स्नातकोत्तर अध्ययन गर्ने विद्यार्थीहरु पनि कम हुने स्मरण गराए ।
विगत एक दशक यता नेपालमै मेडिकल शिक्षा सर्वसुलभ हुँदा हरेक मेडिकल शिक्षा लिने महिला विद्यार्थीहरुको संख्या बढ्दै गएको भन्दै उनले भने, ‘अहिले सर्जरी र एनेस्थेसिया अध्ययन गर्न महिला विद्यार्थीहरु बढिरहनु भएको छ, रातभर अप्रेसन कक्षमा बसेर काम गरिहनु भएको छ । यो गर्व गर्न लायक विषय हो ।’
प्रा.डा. अन्सारीले पिजी विद्यार्थीहरुले ३ वर्ष गर्ने मेहनत, लगनशीलताले उनीहरुको भविष्य निर्धारण गर्ने बताउँदै कुनैपनि रोगको पहिचान र उपचार गर्न बिरामी प्रति गम्भिर र संवेदनशील भएर लाग्नुपर्ने बताए । ‘अबको ३ वर्ष तपाईहरुले गर्ने अध्ययन, बिरामी प्रति देखाउने व्यवहारले तपाईहरुको भविष्य कस्तो हुन्छ निर्धारण गर्दछ । यसकारण आफ्नो पेशा प्रति गम्भिर बन्नुस, मेहनत गर्नुस्, बिरामीहरु प्रति जिम्मेवार भएर प्रस्तुत हुनुहोस् । नेशनल मेडिकल कलेज तपाईहरुको अध्ययन, अध्यापनमा सदैव सकारात्मक सहयोग गर्न तत्पर रहन्छ,’उनले भने ।
कार्यक्रममा कलेजकी प्रबन्ध निर्देशक शाहनावाजÞ अन्सारीले स्वास्थ्य सेवामा काम गर्ने जनशक्तिहरुले मानवीयतालाई प्रमुखता दिएर काम गर्नुपर्ने बताइन् । पछिल्लो समय नेपालको स्वास्थ्य सेवाको विषयहरु कडा बन्दै गइरहेको र कतिपय केसहरु अदालतमा समेत पुगिरहेकोले बिरामीहरुको उपचारमा कुनैपनि लापरवाही, हेलचेक्र्याई नगरी अगाडी बढ्न उनले सुझाव दिइन् ।
कार्यक्रममा कलेजका प्राचार्य प्रा.डा. के एन सिंह ,मार्केटिंग तथा अडमिसन निर्देशक आबिद हुसैन अंसारी ,अस्पताल निर्देशक डा. इसरत जहाँ अंसारी, भाइस प्रिन्सिपल डा. रवि शंकर गुप्ता , भाइस प्रिन्सिपल बि डी एस प्रो.डा. सरोज प्रसाद देव , नर्सिङ निर्देशक प्रो.गंगा गुरुङ , भाइस प्रिन्सिपल नर्सिङ प्रो.डा.बबिता सिंह , प्रमुख पिजी संयोजक प्रो.डा.रवि कुमार शाह लगाएत पिजी फेकेल्टीका प्रमुखहरु उपस्थिति रहेको थियो ।