काठमाडौं,१५बैशाखःराष्ट्रिय प्रजातन्त्र पार्टी नेपालका अध्यक्ष कमल थापाले २०७८ मंसिरमा भएको एकता महाधिवेशनमा पराजित भएयता पहिलो पटक राजेन्द्र लिङ्देनको नेतृत्वको स्वीकारेका छन् ।
थापाले सोमबार रत्नपार्कको शान्ति बाटिकामा आयोजित पार्टीको कार्यक्रमलाई सम्बोधनका क्रममा लिङ्देनको नेतृत्वलाई स्वीकारेका हुन् ।उनले आफूहरू अलग अलग पार्टीमा रहे पनि एजेन्डामा एकै ठाउँ रहेको टिप्पणीसमेत गरेका छन् ।
थापाले मञ्चमा सँगै उभिएका लिङ्देनको हात समातेर उनलाई नेता मान्न तयार भए। त्यसपछि थापा र लिङ्देनसँगै केशरबहादुर विष्ट र राजावादी आन्दोलनका संयोजक नवराज सुवेदी पनि हात समात्न आइपुगे ।
‘हामी एक ठाउँमा छौँ, एक भएर रहन्छौँ । एउटा कुरा प्रष्ट छ, राप्रपा देशको अहिलेको सबैभन्दा ठूलो र बलियो राष्ट्रवादी शक्ति हो’, उनले भने, ‘राप्रपाले नै सबैले समेट्ने गरी अघि बढ्नुपर्छ । यो पहलकदमी लिनका लागि राजेन्द्र लिङ्देनलाई आग्रह गर्छु ।लिङ्देनले पहलकदमी लिएर सबै राष्ट्रवादी/राजावादी शक्तिहरूलाई एकै ठाउँमा ल्याउनुपर्छ ।’
त्यसअघि शान्ति बाटिकाको कार्यक्रममा पुगेका लिङ्देनले थापालाई दाइ भनेर सम्बोधन गर्दै नमस्कार गरेका थिए । त्यसबेला दुई नेताबीच केहीबेर भलाकुसारी पनि भएको थियो । यो दृश्यले त्यहाँ उपस्थित राजावादी कार्यकर्ताहरू हौसिएका देखिन्थे ।
गत चैत १५ गते काठमाडौंको तीनकुनेमा आयोजित राजावादीको प्रदर्शनको नेतृत्व दुर्गा प्रसाईं र नवराज सुवेदीले गरेका थिए । उक्त आन्दोलनयता राप्रपा नेपालका अध्यक्ष थापा छायामा परेका थिए । उता राप्रपालाई पनि शीर्ष नेता पक्राउ परेर धक्का लागेको थियो ।
कुनै बेला लिङ्देनलाई राप्रपाको अध्यक्षसमेत स्वीकार्न तयार नभएका थापा अब उनकै अगुवाइमा राजा फर्काउने अभियानलाई अघि बढाउन तयार भएका छन् । त्यहीअनुसार उनले लिङ्देनलाई आफ्नो नेता मान्न तयार रहेको जनाऊ रत्नपार्कको शान्तिबाटीकाबाट दिएका छन् ।साभारः खबरहब