वीरगन्ज,१८पुस:नेपाल पत्रकार महासंघ पर्सा र वीरगन्ज कलेजबीच ७ बुँदे समझदारी पत्रमा हस्ताक्षर भएको छ।बिहीबार हस्ताक्षर भएकाे उक्त समझदारी पत्रमा पत्रकार महासंघ पर्साका तर्फबाट अध्यक्ष ओमप्रकाश खनाल र वीरगन्ज कलेजका तर्फबाट कलेजका अध्यक्ष डा. दिपेन्द्र चाैधरीले हस्ताक्षर गरेका छन् ।
उक्त समझदारी पत्र अनुसार, पत्रकारिता अध्ययन गर्न चाहने पर्साका पत्रकारलाई वीरगन्ज कलेजले कक्षा ११ र १२ मा प्रतिवर्ष ५ हजार रुपैयाँमात्र शुल्क लिने उल्लेख छ।
समझदारी पत्रमा दुवै संस्थाले पर्सा जिल्लाको शैक्षिक क्षेत्रको सुधारको लागि विभिन्न बहस र अन्तरक्रियाको आयोजनाका लागि आपसी समन्वय गर्ने,पर्साका पत्रकारहरूको दक्षता अभिवृद्धि र विकासका लागि सहकार्य गर्ने उल्लेख छ।
पत्रकार महासंघ पर्सा शाखाकाे कार्यालयमा भएको समझदारी पत्र हस्ताक्षर कार्यक्रममा पत्रकार महासंघ पर्साका पदाधिकारी,सदस्य लगायतकाकाेपनि उपस्थिति रहेकाे थियाे ।
