वीरगन्ज,१६पुसःतेस्रो लिङ्गीको भेष धारण गरेर लागू औषधको तस्करी गर्ने एक युवक वीरगन्जबाट पक्राउ परेका छन् । पक्राउ पर्नेमा पर्साको बहुदरमाई नगरपालिका वडा नम्बर ३ का ३६ वर्षीय मिश्री राम रहेका छन् ।
भारतको रक्सौलबाट हरि खुर्सानीको बोरामा लागू औषध लुकाएर टाँउकोमा बोकेर वीरगन्ज आउँदै गरेका रामलाई सशस्त्र प्रहरीले वीरगन्ज भन्सारको गेट अगाडि रोकेर चेकजाँच गरेको थियो ।
तेश्रो लिंगीको भेष धारण गरेका रामले टाउँकोमा बोकेको खुर्सानीको बोरा खोलेर हेर्र्दा त्यसभित्र लागू औषध डाइजेपाम ४९० एम्पुल,बुप्रेनोर्फाइन ४९९ एम्पुल ,नोर्फिन २९७ एम्पुल र प्रोमेथाजाइन ४९७ एम्पुल बरामद भएको सशस्त्र प्रहरी बल नेपाल नम्बर १३ गण हेडक्वार्टर पर्साका सूचना अधिकारी सशस्त्र प्रहरी नायब उपरीक्षक नरेन्द्रसिंह धामीले जानकारी दिए ।
लागू औषधसहित नियन्त्रणमा लिइएका रामलाई आवश्यक कारबाहीका लागि प्रहरी चौकी ईनर्वामा बुझाइएको उनले बताए ।