वीरगन्ज,१६असाेज:अघिल्लो हप्ता अविरल वर्षाले निम्त्याएको बाढी र डुबानबाट मधेस प्रदेशमा मात्रै ५ अर्ब बढीको धानबाली नष्ट भएको छ।मधेसका आठवटै जिल्लाबाट प्राप्त प्रारम्भिक विवरण अनुसार ४२ हजार ६९ हेक्टर क्षेत्रफलमा लगाइएको धानबालीमा असर पर्दा ५ अर्ब ४ करोड ८३ लाख रुपैयाँ बराबरको क्षति पुगेको अनुमान गरिएको छ।
सबैभन्दा बढी रौतहटमा १० हजार २४३ हेक्टरमा लगाइएको धानबाली प्रभावित भएको छ भने सप्तरीमा ९ हजार ३६७, सर्लाही ६ हजार ५८५, बारामा ६ हजार ४७२, महोत्तरी ४ हजार २५९, धनुषा ७०० र सिराहामा १५८ हेक्टर जमिनको धानबालीमा क्षति पुगेको छ।
यस्तैगरी मधेसमा ४ हजार ३९३ हेक्टर जमिनमा लगाइएको तरकारी नष्ट हुँदा १ करोड ३२ लाख, २२ हेक्टरको फलफूलमा क्षति हुँदा ४४ लाख र ८५ हेक्टरको उखुमा क्षति पुग्दा ३ करोड ४० लाख रुपैयाँको क्षति भएको अनुमान गरिएको छ।
बाढी र डूबानका कारण १४ हजार २०५ वटा पशुपन्छी मर्दा ७६ लाख बराबरको क्षति भएको छ भने ४५८ हेक्टरमा गरिएको मत्स्यपालनमा २३ करोड बढीको क्षति भएको छ। अन्य विवरण आउन बाँकी छ।
मधेस प्रदेशमा बाढी र डुबानले धानबाली, तरकारी, फलफूल, उखु खेतीसँगै माछा पोखरी, पोल्ट्री फार्ममा क्षति पुगेको भूमि व्यवस्था, कृषि तथा सहकारी मन्त्रालयका वरिष्ठ पशु विकास अधिकृत डा. सरोज चौधरीले जानकारी दिए।