वीरगन्ज,१३असोजः वीरगन्जको रानीघाट पुलबाट आइतबार बिहान सरिसवा नदीमा हाम फालेर बेपत्ता भएकी बालिकाको पहिचान खुलेको छ ।
आइतबार बिहान सवा ९ बजेतिर वीरगन्जको रानिघाट र रामगढवा जोड्ने सडकखण्डमा रहेको रानीघाट पुलबाट सरिसवा नदीमा अन्दाजी १६ वर्षकी बालिकाले फालेकी थिइन् । नदीको भेलले बगाएर बेपत्ता भएकी ती बालिकाको अवस्था अझैसम्म अज्ञात नै छ ।
ती बालिका बाराको प्रसौनी गाँउपालिका वडा नम्बर २ खुटवा प्रसौनीका विनोद दासकी छोरी राधिका दास रहेको प्रत्यक्षदर्शीले बताएका छन् । तर पर्साका प्रहरी प्रवक्ता प्रहरी नायब उपरीक्षक दीपक भारतीले भने नदीमा हाम फालेर बेपत्ता भएकी किशोरीको नाम राधिक दास रहेको प्रत्यक्षदर्शीले बताएपनि यसबारे पुष्टि हुन बाँकी नै रहेको बताए ।
उनले भने,‘ ती किशोरी बाराको खुटुवाप्रसाौनी गाँउकी राधिका दास रहेको कुरा आएको छ । तर यसबारे पुष्टि हुन अझै बाँकी छ ।हामीले भेरिफाई गरिरहेका छौं ।’
नदीमा हाम फालेर बेपत्ता भएकी ती किशोरीको खोजीका लागि नेपाल प्रहरी र सशस्त्र प्रहरीको टोलीले डुंगाको मदतले खोजी गरिरहेको भएपनि अहिलेसम्म फेला पार्न भने नसकेको प्रहरी नायब उपरीक्षक भारतीले जानकारी दिए ।