वीरगन्ज,१५साउन:वीरगन्जसहित पर्सा जिल्लाभरी केहि हप्ता यता विद्युत आपूर्तिमा भईरहेकाे समस्याबारे नेपाल तरुण दल पर्साले नेपाल विद्युत प्राधिकरणकाे ध्यानाकर्षण गराएकाे छ।
तरुण दल पर्साका सभापति विकास तिवारीकाे नेतृत्वमा मंगलबार प्राधिकरणकाे वीरगन्ज वितरण केन्द्रमा गएकाे टाेलीले प्राधिकरणका प्रमुख अवधेश दुबेलाई ज्ञापनपत्र बुझाँउदै विद्युत आपूर्तिमा भईरहेकाे समस्याबारे ध्यानाकर्षण गराएकाे हाे ।
दिनमा सयाैं पटक विद्युत आपूर्ति अवरुद्ध हुदाँ त्यसले अहिलेकाे प्रचण्ड गर्मीमा सर्वसाधारण,विद्यार्थी,उद्योगी, व्यवसायी लगायत जिल्लाबासीले नै सास्ती खेपिरहेकाे तरुण दल पर्साले जनाएको छ।विद्युत प्राधिकरणले लाेडसेडिङ पूर्णरूपमा हटिसकेकाे घाेषणा गरेकाे अवस्थामा दिनमा पटक पटक लाइन कट्ने गरेकाे, अघाेषित लाेडसेडिङ भईरहेकाे र यसले जिल्लाबासी अक्रान्त बनेकाे भन्दै तरुण दलले यथाशीघ्र उक्त समस्या समाधान गर्न माग गरेकाे छ।
विद्युत आपूर्तिमा भईरहेकाे समस्या तत्काल समाधान नगरिए विद्युत प्राधिकरण वीरगन्ज वितरण केन्द्रमा धर्नासहित तालाबन्दी गर्ने चेतावनीसमेत तरुण दलले दिएकाे छ।