जनकपुरधाम, १६ असारःमधेस आन्दोलनका क्रममा हत्या गरिएका सशस्त्र प्रहरीका असई ((प्रहरी सहायक निरीक्षक) थमन विक हत्या अभियोगमा जन्मकैदको सजाय सुनाइएका पूर्वप्रदेश सांसद कौशलकुमार यादव पक्राउ परेका छन् ।
फरार रहेका यादवलाई शनिबार राति महोत्तरीको साम्सी गाउँपालिका ५ पोखरीभण्डाबाट पक्राउ गरिएको महोत्तरीका प्रहरी नायब उपरीक्षक सन्तुलाल जयसवालले जानकारी दिए ।
लोसपाका नेतासमेत रहेका यादव उनी लामो समयदेखि फरार थिए ।याादव २०७४ मा तत्कालीन संघीय समाजवादी फोरमबाट महोत्तरी क्षेत्र नं. ४ (क) मा प्रदेश सांसदमा निर्वाचित भएका थिए ।
२०७९ को निर्वाचन अघि जसपाले उनलाई पार्टीबाट निष्काशन गरेपछि उनले लोसपाबाट चुनाव लडेका थिए । तर पराजित भए । अदालतमा मुद्दा चलिरहँदा उनी फरार नै थिए ।
महोत्तरी जिल्ला अदालतले २८ मंसिरमा असई थमन विक हत्या प्रकरणमा लोसपा मधेश प्रदेश संसदीय दलका नेता अभिराम शर्मासहित सात जनालाई जन्मकैदको सजाय सुनाएको थियो ।एमालेका सांसद लक्ष्मी महतो र पुर्पक्षका लागि थुनामा रहेका पवन कापरले भने अदालतबाट सफाइ पाएका थिए ।मधेश आन्दोलनका क्रममा २५ भदौ २०७२ मा महोत्तरीमा सशस्त्र प्रहरी बलका असई थमन बिकको हत्या भएको थियो ।साभारः अनलाइनखबरबाट