वीरगन्ज,८पुषः वीरगन्जस्थित मानव सेवा आश्रममा रहेका लक्षमीनारायणहरुको भोजनका लागि आश्रमका स्वंयसेवकहरुले हरेक शनिबार बजारमा तरकारी संकलन गर्दै आइरहेका छन् ।
यसैक्रममा हिजो शनिबारपनि आश्रमका स्वंयसेवकहरुले वीरगन्जका विभिन्न स्थानमा रहेका तरकारी बजारमा पुगेर हरियो तरकारी, आलु र प्याज संकलन गरेका छन् ।
वीरगन्जस्थित आश्रममा अहिले अशक्त बृद्धबृद्धा , फरक क्षमता भएका र बेसहारा गरि ६० भन्दा बढी लक्ष्मीनारायणहरुलाई राखिएको छ ।
उनिहरुका लागि बिहान र बेलुकीको भोजन र खाजा नास्ताका लागि आवश्यक खाद्यान्न, तेल मशाला , तरकारी लगायतका सामग्री विभिन्न दाता र परोपकारी संघसंस्थाहरुले निःशुल्क उपलब्ध गराउँदै आएका छन् ।
हरियो तरकारी भने आश्रमका स्वंयसेवकहरुले हरेक शनिबार वीरगन्ज बजारमा डुलेर पसलेहरुबाट निःशुल्क संकलन गर्दै आएको आश्रमका मधेस प्रदेश संयोजक देवेश मानव सेवाले जानकारी दिदए ।
