वीरगन्ज,१५कार्तिक : बाराको जीतपुरबाट प्रहरीले जुवा खेलिरहेको अवस्थामा वीरगन्जका दुई जनासहित पाँच जनालाई पक्राउ गरेको छ ।
इलाका प्रहरी कार्यालय सिमराबाट खटेको प्रहरी टोलीले मंगलबार जीतपुरसिमरा उपमहानगरपालिका – ७ स्थित जीतपुर बजारमा जुवा खेलिरहेको अवस्थामा पाँच जना जुवाडेलाई नगद रकम, मोबाइल र मोटरसाइकलसहित पक्राउ गरेको हो ।
जीतपुर बजारका लालबाबु साहको घरबाट उनीहरूलाई ५० हजार नेपाली रुपैयाँ, तीन थान ठूलो र एक थान सानो मोबाइल, दुई वटा मोटरसाइकल र केही भारतीय रकमसहित नियन्त्रणमा लिइएको जिल्ला प्रहरी कार्यालय बाराले जनाएको छ ।
पक्राउ पर्नेमा वीरगन्ज महानगरपालिका वडा नम्बर ३२ का ४० वर्षीय विनोद पञ्जियार र ५२ वर्षीय मोती साह, बाराको जीतपुरका ५५ वर्षीय शिवचन्द्र सहनी, ६० वर्षीय लालबाबु साह र ५० वर्षीय अफताव आलम रहेका छन् । जिल्ला प्रहरी कार्यालय बाराले नियन्त्रणमा रहेका पाँच जनामाथि कानुनी कारबाही अगाडी बढाइएको जनाएको छ ।