वीरगन्ज,१३ असोज : संघीय सरकारका जनसंख्या तथा स्वास्थ्यमन्त्री मोहन बहादुर बस्नेतले नारायणी अस्पतालमा अबको तीन महिना भित्रै मृगौला प्रत्यारोपण (किड्नी ट्रान्सप्लान्ट) सेवा सञ्चालन गरिने घोषणा गरेका छन् ।नारायणी अस्पताल स्थापनाको १३१ वर्ष पुरा गरेको उपलक्ष्यमा शनिबार आयोजित प्रथम वार्षिकोत्सव समारोहमा बोल्दै स्वास्थ्यमन्त्री बस्नेतले यो घोषणा गरेका हुन् ।
उनले नारायणी अस्पतालमा विद्यमान समस्या सम्बोधनका लागि आँफु गम्भिरताका साथ लाग्ने प्रतिबद्धतापपनि जनाए । सर्वोच्च अदालतमा विचाराधिन पाँच सय शैया भवन बारेको मुद्धा छिटटै टुंगोमा पुरयाउन पहल गर्ने आश्वासनपनि उनले दिए । उनले भने,‘ प्रधानन्यायधिशलाई आँफै भेटेर यो मुद्धाको छिट्टै किनारा लगाउन आग्रह गर्छु ।
उनले भने,‘ अरु आवश्यक उपकरणहरु र जनशक्ति व्यवस्थापनका लागि मन्त्रालय र मैले के के गर्नुपर्छ ती सबै गर्छौ ।
मन्त्री बस्नेतले नारायणी अस्पताल र समग्र वीरगन्जको विकासका लागि सहयोग गर्न आफु तयार रहेकोपनि बताए । उनले पर्साको पोखरिया अस्पतालको स्तरोन्नत्तीका लागिपनि पहल गर्ने बताए ।
फरक प्रसंगमा स्वास्थ्यमन्त्री बस्नेतले स्वास्थ्य मन्त्रालयमा पहिलेदेखि विद्यमान बेथिती र अनियमितता अन्त्य गर्ने प्रयासमा आफु लागिपरेकोपनि बताए ।उनले भने,‘ अबको ६ महिनामा स्वास्थ्य मन्त्रालय मन्त्रालय जस्तो बनाएरै छाड्छु ।आँफु स्वास्थ्यमन्त्री बनेको एक सय दिनको अवधीमा नीतिगत सुधार लगायत एक सय २९ वटा काम गरेकोपनि उनले सुनाए । उनले भने,‘मन्त्री पदमा जति दिन वा जति घण्टा रहन्छु स्वास्थ्य क्षेत्रको सुधार गर्ने प्रयासमै लाग्छु ।
स्वास्थ्यमन्त्री बस्नेतले स्वास्थ्य क्षेत्रमा अहिले देखिएका समस्या समाधान गर्न र स्वास्थ्थ्यकर्मीमाथिको आक्रमण लगायतका उच्छृंखल गतिविधी रोक्न हाल रहेको दरबन्दी बढाउनैपर्ने बताए । उनले भने,‘ जबसम्म स्वास्थ्यकर्मीहरुको दरबन्दी बढाएर पदपूर्ती गर्न सकिदैन तबसम्म स्वास्थ्य क्षेत्रमा देखिएका समस्या समाधान हुनै सक्दैन । उनले देशभरका स्वास्थ्य संस्थामा अहिले चिकित्सकको ३ हजार र नर्सको २९ हजार दरबन्दी थप्नुपर्ने आवश्यकता रहेकोपनि बतााए ।
नारायणी अस्पतालका निमित्त मेसु डा. चितरञ्जन साहको अध्यक्षता तथा स्वास्थ्यमन्त्री मोहन बहादुर बस्नेतको प्रमुख आतिथ्यतामा भएको कार्यक्रममा मधेस प्रदेशका स्वास्थ्यमन्त्री वीरेन्द्र सिंह, प्रतिनिधिसभा सदस्यहरु प्रदीप यादव, अजय चौरसिया, प्रभु हजरा, वीणा जयसवाल , प्रदेशसभा सदस्यहरु जनार्दन सिंह क्षेत्री , श्याम पटेल, वीणा शर्मा , वीरगन्ज महानगरपालिकाका मेयर राजेशमान सिंह, उपमेयर इम्तियाज आलम लगायतकोपनि सहभागीता थियो ।