वीरगन्ज,५असाेज: भारतले एकदिवसीय क्रिकेट श्रृंखलाकाे पहिलाे खेलमा अष्ट्रेलियालाई पाँच विकेटले हराएको छ । योसँगै तीन खेलको श्रृंखलामा भारतले १-० को अग्रता लिएको छ ।
अष्ट्रेलियाले जितको लागि दिएकाे २ सय ७७ रनको लक्ष्य भारतले ४८.४ ओभरमा ५ विकेट गुमाउँदै पूरा गरेकाे हाे । भारतको जितमा ओपनर शुभमन गिलले ६३ बलमा ६ चौका र २ छक्कासहित सर्वाधिक ७४ रनको योगदान दिए । अर्का ओपनर ऋतुराज गायकवाडले ७७ बलमा १० चौकासहित ७१ रन बनाए ।सूर्यकुमार यादवले ४९ बलमा ५ चौका र १ छक्कासहित ५० रन बनाए। कप्तान लोकेश राहुलले ६३ बलमा ४ चौका र १ छक्कासहित अविजित ५८ रनकाे याेगदान दिए ।
बलिङतर्फ अष्ट्रेलियाका स्पिनर एडम जाम्पाले १० ओभरमा ५७ रन खर्चेर २ विकेट लिए । शन एबोट र प्याट कमिन्सले एक एक विकेट लिए ।
त्यसअघि पन्जाब क्रिकेट एसोसिएसनमा टस हारेर पहिला ब्याटिङको निम्तो पाएको अष्ट्रेलियाले ५० ओभरमा २ सय ७६ रन बनाएको थियाे । ओपनर डेविड वार्नरले ५३ बलमा ६ चौका र २ छक्कासहित सर्वाधिक ५२ रन बनाए ।
भारतका तीव्र गतिका बलर मोहम्मद शामीले १० ओभरमा १ मेडनसहित ५१ रन खर्चेर ५ विकेट लिए । जस्प्रित बुमराह, रविचन्द्रन आश्विन र रविन्द्र जडेजाले एक एक विकेट लिए । दोस्रो खेल आइतबार इन्डोर र तेस्रो खेल बुधबार हुनेछ ।