वीरगन्ज, २५ साउन : वीरगन्जमा पछिल्लो चार महिनामा १ हजार ४ सय घरमा नेपाल खानेपानी संस्थानको धारा जडान गरिएको छ ।
गत बैशाख यता वीरगन्ज महानगर क्षेत्रमा चापाकलहरु सुकेर खानेपानीको समस्या भएपछि संस्थानको धारा जडान गर्ने सेवाग्राहीको संख्या बढ्दै गएको छ । पछिल्लो चार महिना यता विभिन्न वडामा गरि १ हजार ४ सय घरधुरीले खानेपानी संस्थानको धारा जडान गराएको वीरगन्जस्थित खानेपानी संस्थान कार्यालयले जनाएको छ ।
वीरगन्ज महानगरमा गत वैशाखमा ४१, जेष्ठमा १ सय ५७, असारमा २ सय २ र साउन २४ गतेसम्म १ हजार ग्राहकको घरमा धारा जडान गरिएको खानेपानी संस्थान वीरगन्जका प्रमुख इन्जिनियर निरण महर्जनले जानकारी दिए । यस्तै महानगरपालिकाको कार्यालयले खानेपानीको महसुल तिर्ने गरी विभिन्न वडामा १ सय ५० स्थाानमा सामुदायिक धारा जडान गरिएकोपनि उनले बताए ।
लामो समयदेखि वर्षा नहुँदा वीरगञ्जका विभिन्न स्थानमा गत वैशाखदेखि खानेपानीको समस्या क्रमशः बढ्दै गएपछि धारा जडान गराउनेको सङ्ख्या पनि बढ्दै गएको प्रमुख महर्जनले बताए । उनका अनुसार अहिले दैनिक ५०÷६० जना धारा जडानका लागि निवेदन लिएर कार्यालय आउने गरेका छन् । चापाकल, कुवालगायतका खानेपानीका मुहान सक्न थालेपछि धारा जडान गराउने क्रम बढेको उनको भनाइ थियो ।
“पहिला चापाकलबाट पानी आउँथ्यो, त्यतिबेला खानेपानी संस्थानको धारा जडानका लागि लिन स्थानीयले खासै रुचि देखाउदैनथे , उनले भने, “ तर अहिले चापाकल, कुवालगायतका खानेपानीका स्रोत सुक्न थालेपछि संस्थानको धारा जडानका लागि आउने ग्राहकको संख्या ह्वात्तै बढेको छ ।”
संस्थानले दैनिक ६०देखि ६५ लाख लिटरसम्म खानेपानी उत्पादन गरी महानगरभित्र वितरण गर्दै आइएको बताउँदै महर्जनले संस्थानसँग १० हजार घरधुरीलाई खानेपानी वितरण गर्ने क्षमता रहेको जानकारीपनि दिए ।