वीरगन्ज ,२३जेष्ठ : संघीय सरकारका उद्योग वाणिज्य तथा आपूर्तिमन्त्री रमेश रिजालले वर्तमान सरकार र सत्तागठबन्धन पाँच वर्षसम्म नै टिक्ने दाबी गरेका छन् ।
जनकपुरधाममा मंगलबार सञ्चारकर्मीहरुसंग कुरा गर्दै पर्सा क्षेत्र नम्बर ४ का प्रतिनिधि सभा सदस्य समेत रहेका रिजालले भने, विगतमा राजनीतिक अस्थिरताका कारण सरकार बनाउने र ढाल्ने खेलहरु भए। तर अब याे सरकार र गठबन्धन पाँच वर्षसम्मै टिक्छ, कुनै उथुलपुथुल हुदैन ।
मन्त्री रिजालले सरकार व्यापार गर्ने काममा लाग्नु नहुनेपनि बताए । सरकारले व्यापार गर्ने नभइ व्यापारका लागि सहजीकरण मात्रै गरिदिने उनको भनाइ थियाे ।उनले भने, व्यापार निजी क्षेत्रले गर्ने हाे , सरकारले निजी क्षेत्रलाई व्यापारका लागि सहयोग गरिदिने हाे।
उनले उद्योग व्यपार क्षेत्रमा देखिएका समस्या समाधान गर्न सरकार तयार रहेको पनि बताए । उनले बजेटको ट्रेडिसनल सिस्टम पञ्चायत कालदेखि नै रही आएकाले यसलाई परिवर्तन नगरेसम्म देश र उद्योगीहरु सुखी हुन नसक्ने बताए ।