वीरगन्ज,१८बैशाख : वीरगन्ज नाकामा करोडौंको लागतमा निर्माण गरिएको होल्डीङ सेन्टर प्रयोग विहिन भएपछि त्यसलाई जनहितका काममा प्रयोगमा ल्याउन यहाका जनप्रतिनिधीले सरकारलाई सुझाव दिएका छन् ।पर्सा क्षेत्र नम्बर १ का प्रतिनिधिसभा सदस्य प्रदीप यादव र वीरगन्ज महानगरका मेयर राजेशमान सिंहले सोमबार बिहान निमाृणपछि प्रयोगविहिन रहेको होल्डीङ सेन्टरको स्थलगत अनुगमन गर्दै यस्तो सुझाव दिएका हुन् ।
कोभिड महामारीका बेला भारतबाट भित्रिने यात्रुको स्वास्थ्य चेकजाँच तथा संक्रमितहरुलाई क्वारेन्टीनमा राख्नका लागि सरकारले वीरगन्ज नाका स्थित भन्सार छेउमा १ हजार शैया क्षमताको करिब २८ करोड रुपैयाको लागतमा होल्डीङ सेन्टर निर्माण गरेको थियो । उक्त सेन्टरमा कुल ६० वटा भवन छन् । जसमध्ये १३ वटा भान्सा घर र २२ वटा शौचालय पनि छन् । तर होल्डी सेन्टर निर्माण भएको करिब एक वर्ष बित्दासमेत प्रयोगविहिन अवस्थामा छ ।
सोमबार स्थलगत अनुगमनपछि प्रतिनिधीसभा सदस्य यादवले करोडौँको लागतमा निर्मित संरचनालाई उपयोगविहिन अवस्थामा राख्न नहुने बताए । लामो समयदेखि प्रयोगविहिन रहेको होल्डीङ सेन्टरको संरचनालाई जनहितका काममा उपयोगमा ल्याउनुपर्ने पूर्व वन तथा वातावरण मन्त्रीसमेत रहेका यादवले बताए ।
यादवले भने, ‘राज्यले करोडौँ लगानी गरेको संरचनालाई यत्तिकै थन्किन दिनु हुँदैन, कुनै न कुनै किसिमका जनताको हितमा हुने कामका लागि उपयोग गर्न आवश्यक छ, त्यसका लागि म सम्बन्धीत निकायसँग समन्वय गर्नेछु ।’
यस्तै वीरगन्ज महानगरका मेयर सिंहले पनि प्रयोग विहिन होल्डीङ सेन्टर महानगरबासीको हितका लागि हुने कुनै कामका लागि प्रयोजनमा ल्याउन सकिने बताए ।