Madhes Khabar
अन्तरवार्ता हेडलाइन

आउँदो चुनाव पनि उपेन्द्र यादव लडेकै क्षेत्रबाट म पनि लड्छु : शीवचन्द्र कुशवाहा (अन्तरवार्ता)

बैशाख १० मा भएको उपनिर्वाचनमा बारा २ मा निर्वाचित जनता समाजवादी पार्टी (जसपा) नेपालका राष्ट्रिय अध्यक्ष उपेन्द्र यादवका निकटतम प्रतिस्पर्धी जनमत पार्टीका उम्मेदवार शीवचन्द्र प्रसाद कुशवाहासंग चुनावी नतिाजा बारे क्रान्ति शाहले गरेको कुराकानी

उपनिर्वाचनमा भएको पराजयलाई कसरी लिनुभएको छ ?

चसनावमा जनताले दिएको जनादेशलाई मैले सहर्ष स्वीकारेको छ । यद्यपि कानूनी रुपमा चुनाव मैले हारेको भएपनि व्यवहारिक रुपमा भने मैले नै जितेको महसुस गरिरहेको छु । किनकि चुनावी मैदानमा म जनमत पार्टीको उम्मेदवार एक्लै थिए । तर मेरो विरुद्ध पाँच दलीय गठबन्धनसंगै संघीय , प्रदेश र स्थानीय गरि तीनै तहका सरकार समेत मिलेर लडेका थिए । तैपनि बारा २ का जनताले जुन मत मलाई दिएका छन् त्यो मतसंग पाँच दलीय गठबन्धनले पाएको मत पाँच भागमा विभाजन गरेर तुलाना गर्ने हो भने त मैले पाएको मत त अहिलेको जितेकाको भन्दा कयौं गुणा बढि हुन्छ । त्यसै कारणले यो मेरो हार होइन मेरो जिते हो भनेर सम्झेको छु ।

बारा २ मा सिके राउतको खटाइले मात्र यति धेरै मत जनमत पार्टीले पाएको हो भन्छन् नि ?

बारा २ मा मैले पाएको मत , हाम्रा पार्टीका राष्ट्रिय अध्यक्ष सिके राउत अनि मेरो पनि प्रभावले पाएको मत हो । यो स्वभाविक हो । पार्टीका राष्ट्रिय अध्यक्ष सिके राउत रातदिन खटिनु भयो । जनताको बिचमा गएर आफनो पार्टीका उम्मेदवार शीवचन्द्र कुशवहालाई भोट माग्नु भयो । हामी दुई जनासंगैसंगै पनि जनताको घरदैलोमा पुग्यौ , जनतासंग हर्न छापमा मत माग्यौ । जनताले जनमत पार्टीको चुनाव चिन्ह हर्न छापमै मत दिएको हो ।त्यसकारण यस्को उस्को कारण वा यस्को प्रभाव वा उस्को प्रभाव भनेर छुट्याउनु उचित हुदैन ।पार्टीको लोकप्रियताका साथै हामी दुवैको खटाई र प्रभावले जनमत पार्टीलाई यतिधेरै मत आएको हो ।

चुनावी प्रचारका क्रममा तपाईले त महागढीमाइ माताको आशीर्वाद ममाथि छ , फरकिलो मतान्तरले मैले नै जित्छु भनेर दावी गर्दै आउनु भएको थियो तर तपाइको दाबी अनुसार जित त सुनिश्चित भएन नि ?

म जित्नकै लागि चुनाव लडेको थिए । म मात्रै होइन चुनावमा कुनै पनि उम्मेदवार जित्नकै लागि लड्छ । मैले अघिपनि भनिसके , कांग्रेस , जसपा , माओवादी लगायतका पाँच दल मात्र होइन तीनै तहको सरकार प्रमुखहरु मिलेर मेरो विरुद्ध लाग्दा समेत उनिहरुका उम्मेदवार (जसपा अध्यक्ष उपेन्द्र यादव ) ले जुन मतान्तरले जितेका छन् , त्यो मतान्तरले नै भन्छ कि यो मेरो हार होइन यो मेरो जित हो । यो कुरा जनतामा गएर सोध्दा पनि हुन्छ । र अर्को कुरा आउदा चुनावहरु अहिलेका गठबन्धन दलहरुले फेरि पनि गठबन्धन नै गरेर लड्छन भन्ने ग्यारेन्टी छैन । एक्ला एक्लै लड्छन् होला । त्यसबेला म कुन स्थानमा रहन्छु अहिले पाएको मतले नै संकेत गरिरहेको छ । अहिले पाँच दलीय गठबन्धनले पाएको मतलाई पाँच भागमा बाँडेर हेर्दा थाहा भइहाल्छ नि एक्लै एक्लै लडेको भए कसले जितेको छ कसले हारेको छ ।

यत्ति नजिकको मतान्तरले पराजित हुनुप¥यो । यस्तो खालको मत आउनुमा उमेदवारको कमजोरी कि पार्टीको ?

चुनाव भनेको हारजितको खेल हो । एउटाले जित्छ अर्कोले हार्छ । चुनावको लडाइमा एक जनाले जित्छ अर्कोले हार्छ । चाहे थोरै मतले हारोस या धेरै मतले जितोस् । तर कटु सत्य के हो भने एउटाले जित्छ अर्कोले हार्छ नै । मलाई जुन मत आएको छ त्यसले के देखाइरहेको छ भने ,, यसमा कसैको कमजोरी होइन । जनताले मलाई २३ हजार ३३४ मत दिएको छ यदि उम्मेदवार वा पार्टीको कमजोरी भएको भए जनताले विश्वास गरेर त्यति धेरै मत दिदैनथ्यो । त्यसका कारण उम्मेदवार वा पार्टी कसैको कमजोरी होइन । यो प्रश्न सोध्नु नै गलत हो । प्रश्न नै परिपक्व भएन । यदि कमजोरी भएको भए जनताले त्यतिधेरै मत पक्कै दिने थिएन ।

पुराना दलहरुप्रतिको वितृष्णाले पनि मत बढेको हो जस्तो लाग्दैन ?

पहिलो कुरा जनमत पार्टीको एजेण्डा नै जनामुखी छ । जनमत पार्टीले लिएको मुद्धा जनताको हितमा छ । त्यस कारण जनमत पार्टीलाई जनताले अहिले मन पराइरहेका छन् । पाँच दल र तीनै तहका सरकारका प्रमुखहरु आफना एकल उम्मेदवारलाई जिताउन र मलाई हराउन घरमा घरमा धाएर भोट मागे । बहालवाला र पुर्व गरि तीन जना प्रधानमन्त्री समेत आएर मलाई हराउन सारा शक्ति लगाए । मधेसका मुख्यमन्त्री त मतदानका दिन समेत बुथ बुथमा गएर आफना उम्मेदवारका लागि भोट मागे ।मतदानको अघिल्लोदिन राति पैसाको बिटो समेत उनिहरुले बाँडे । मतदानका दिन ठाँउ ठाँउमा बुथ कब्जा पनि गरे ।सिङगो राज्य र सरकार प्रमुखहरुले समेतले सारा शक्ति लगाउदा पनि मैले त्यति धेरै मत पाए , थोरै मतले मात्रै मैले हार्नु परयो । यसले नै पुष्टि गर्छ कि यति धेरै मत जनताले जनमत पार्टीलाई औधी मन पराएर दिएका हुन् , जनतामा जनमत पार्टीको लोकप्रियता बढ्दो छ । रहयो पुरानो भनिएका दलहरुको कुरा । उनीहरुले अहिलेसम्म जनताका लागि के गरे ? आफनो स्वार्थका लागि के गरे ? त्यसको समिक्षा जनताले गर्न सुरु गरिसकेका छन् । अहिलेको चुनावमा पनि जनताले ती दलहरुको समिक्षा गरेर नै मत दिएका हुन् । यद्यपि अंकगणितीय हिसाबले मैले हारे पनि जनताले जनमत पार्टीमाथि भरोसा गरेर दिएको मतले मैले जितेको छु भनेर बारा २ का जनताले नै भनिरहेका छन् ।

अब आउने निर्वाचनमा दलहरुको भविष्य कस्तो होला ?

आफुलाई ठूला भन्ने दलहरुको अब भविष्य नै छैन भनेपनि हुन्छ ।पाँच दलले गठबन्धन गरेर लड्दा त यति धेरै शक्ति लगाउनु परयो उनिहरुलाई ।बारा २ मा जितेपनि पाँच दलका स्थानीयदेखि शीर्ष नेताहरु खुशी छैनन् , उनीहरुको अनुहार अध्याँरै छ , अनुहारमा थोरै पनि हाँसो देखिएको छैन । बारा २ मा पाँच दल मिलेर लड्दा त जित निकाल्न यति सकस भयो भने अब एक्लै लड्दा त झन के हविगत हुने हो भन्ने भयले अहिलेदेखि नै उनीहरुलाई सताउन सुरु गरिसकेको छ । बारा २ मात्र होइन् उपनिर्वाचन भएको चितवन २ र तनहुँ २ को निर्वाचन परिणामले पनि ती दलहरुको मुटुमा ढ्याङग्रो ठोकिसकेको छ । ती दलहरुमा पहिरो जान सुरु पनि भइसकेको छ ।अर्को कुरा सधैभरि चुनावमा गठबन्धन नै भइहाल्छ भन्ने ग्यारेण्टी त हुदैन । अब हुने चुनावमा एक्ला एक्लै लड्नु पर्छ , त्यो बेला हाम्रो हविगत के हुन्छ भन्ने डरत्रासमा उनिहरु अहिलेदेखि नै छन् ।

गठबन्धनको उमेरदवारले जित्नुभएको छ, अब उहाँलाई तपाईंको कस्तो सहयोग रहनेछ ?

पहिलो कुरा त अब साढे ४ वर्षपछि हुने निर्वाचनमा उपेन्द्र यादवले जुन क्षेत्रबाट चुनाव लड्छन् म पनि त्यहि क्षेत्रबाट लड्छु यो घोषणा अहिले नै गरे मैले । उप्न्द्र जी लडेकै क्षेत्रबाट चुनाव लडेर त्यहिबाट मैले उपेन्द्र जीलाई पराजित गरेरै छाड्छु ।किनकि यसपालि बारा २ मा जनताले उपेन्द्र जी र मलाई दिएको मतले मत निक्कै उत्साहित छु ।रहयो कुरा अहिले बारा २ बाट निर्वाचित उपेन्द्र जीलाई सहयोग गर्ने सवालमा भने म के भन्न चाहन्छु भने म जनताको सेवक हुँ , हारेपनि जितेपनि म जनताको सेवामै समर्पित रहन्छु । यस क्षेत्रका जनताको विश्वास र भरोसा सधै ममाथि छ । त्यसलाई म आगामी दिनमा टुट्न दिने छैन । क्षेत्रको विकास र समृद्धि अनि जनताको सेवामा मेरो सकरात्मक भूमीका सधै रहन्छ । उपेन्द्र जीले यो क्षेत्र र यहाँको जनताको लागि राम्रो काम गरे भने मेरो सकरात्मक भुमीका रहनेछ यदि गलत काम गरे , जनविरोधी काम गरे भने त्यसको भण्डाफोर गर्न म पछाडि हट्दीन ।

आफ्नो पार्टीलाई अझै बलियो बनाउँदै लैजान तपाईंको भूमिका कस्तो हुनेछ ?

साच्चै भन्ने हो भने उपनिर्वाचन हुदाँ सम्म बारा २ मात्र जनमत पार्टीको संगठन विस्तार भइसकेको थिएन । तर अब बारा २ मा मात्र नभइ समग्र बारा जिल्लाभरमै जनमत पार्टीको संगठन विस्तारमा हामी लाग्छौ । वडा वडा तहमा हामी जनमत पार्टीको संगठन बनाउछौं । किनकि मंसिर ४ को निर्वाचनमा मधेसमा जनमत पार्टी प्रति देखिएको जनउभारले अबका दिनमा मधेसमा जनताले विकल्प खोजीरहेको प्रष्टै देखिन्छ । त्यसकारण बारामा मात्र नभइ मधेसमै जनमत पार्टीलाई १ नम्बरको पार्टी बनाउनका लागि हामी अहोरात्र खट्छौ ।

Related posts

जन्मदिनमा युवा उद्यमी अग्रवालले रक्त सञ्चार केन्द्रलाई दिए नगद २१ हजार

MadhesKhabar

जोखिमपूर्ण काममा खटिने कर्मचारीको जीवन बिमाको व्यवस्था गर्छु : वन मन्त्री यादव

MadhesKhabar

महोत्तरी मटिहानीको आगलागी(अपडेट): १२५ घरगाेठ जलेर बस्ती नै सखाप

MadhesKhabar

Leave a Comment