वीरगन्ज,२०फागुन : वीरगन्जका सामाजिक अभियन्ता एंव युवा नेता ओमप्रकाश सर्राफ सिके राउत नेतृत्वको जनमत पार्टीमा प्रवेश गरेका छन् ।
शनिबार काठमाण्डौस्थित जनमत पार्टीको कार्यालयमै आयोजित कार्यक्रममा जनमत पार्टीका अध्यक्ष डाक्टर राउतको हातबाट सदस्यता लिएर सर्राफ जनमत पार्टीमा प्रवेश गरेका हुन् ।
वीरगञ्ज महानगरपालिका वडा नम्बर १६ नगवा निवासी सर्राफ गत मंसिर ४ मा सम्पन्न निर्वाचनमा पर्सा क्षेत्र नम्बर १ (ख) मा हाम्रो नेपाली पार्टीको लौरो चुनाव चिन्ह लिएर प्रदेशसभभा सदस्यको प्रत्याशी बनेका थिए ।
त्यसअघि २०७४ को निर्वाचनमा पनि उनि स्वतन्त्रबाट प्रदेश सभा सदस्यमा उम्मेदवारी दिएका थिए । मधेस आन्दोलनबाट राजननीतिक यात्रा थालेका सर्राफ विगतमा लोकतान्त्रिक समाजवादी पार्टी (लोसपा) को वीरगन्ज महानगर अध्यक्षसमेत बनेका थिए ।
शनिबारको पार्टी प्रवेश कार्यक्रममा जनमत पार्टीका उपाध्यक्ष दिपक साह, पार्टीका नेता बिपि साह लगायतको पनि सहभागिता थियो ।