मधेसखबर
वीरगन्ज,१९ असार : वीरगन्ज महानगरपालिकाले आइतबार (आज) श्वेतपत्र जारी गर्दैछ । महानगरपालिकाको आर्थिक, शैक्षिक, सामाजिक, पूर्वाधार विकास, स्वास्थ्य क्षेत्रका साथै सन्चालनमा रहेका विभिन्न परियोजनाहरुको वर्तमान अवस्थाका बारेमा जानकारी दिन श्वेतपत्र जारी गर्न लागिएको हो ।
महानगरमा नयाँ नेतृत्व निर्वाचित भएर आएपछि गत जेठ २३ गते बसेको नगरकार्यपालिकाको पहिलो बैठकले नै श्वतेपत्र जारी गर्ने निर्णय गरेको थियो । त्यहि निर्णय अनुसार महानगरले श्वेतपत्र तयार पार्नका लागि वीरगन्ज कलेजका अध्यक्ष समेत रहेका अर्थविद् डाक्टर दिपेन्द्र चौधरीको संयोजकत्वमा ९ सदस्यिय श्वेतपत्र तर्जुमा समिति गठन गरेको थियो ।
उक्त समितिले तयार पारेको श्वेतपत्र आइतबार अपरान्ह ३ बजे महानगरपालिकाको सभाकक्षमै कार्यक्रम गरेर जारी गर्न लागिएको मेयर राजेशमान सिंहका स्वकीय सचिव सत्यराज घिमिरेले जानकारी दिए ।
उनका अनुसार , श्वेतपत्र मार्फत महानगरवासीलाइ महानगरको विगतको नेतृत्वको पालामा भएका कामका साथै महानगरको वर्तमान आर्थिक , शैक्षिक, सामाजिक, पूर्वाधार विकास, स्वास्थ्य क्षेत्रको अवस्था ,सन्चालन र निर्माणाधीन योजनाको अवस्था बारे जानकारी गराइनेछ ।
आइतबार जारी हुने श्वेतपत्रले विगतको नेतृत्वले गरेका काम र महानगरकोे वर्तमान अवस्था बारे छर्लङग हुने घिमिरेले बताए ।