क्रान्ति शाह
वीरगन्ज,२५ बैशाख : बैशाख ३० गते हुने स्थानिय तह निर्वाचनमा मधेस प्रदेशमा ९ जना निर्विरोध निर्वाचित भएका छन् ।
पर्सामा २ दलित महिला सदस्य सहित मधेस प्रदेशमा ९ जना निर्विरोध निर्वाचित भएका हुन् । मधेस प्रदेशमा निर्विरोध निर्वाचत हुने सबै जना महिला हुन् ।
बैशाख ११ र १२ गते भएको मनोनयन दर्तामा एकल उम्मेदवारी परेका कारण उनिहरु निर्वाचित भएका हुन् ।
पर्साको वीरगन्ज महानगरपालिका वडा नम्बर ६ को दलित महिला सदस्यमा काँग्रेसकी सुशीला परियार र पटेर्वासुगौली गाँउपालिका वडा नम्बर १ को दलित महिला सदस्यमा जसपाकी बसन्ती देवी मुसहर निर्विरोध निर्वाचित भएका हुन् ।
यस्तै बारामा भने ३ जना निर्विरोध निर्वाचित भएका छन् । बाराको कलैया उपमहानगरपालिका वडा नम्बर २४ को महिला सदस्य पदमा काँग्रेसकी फुलमति थरुनी , जितपुरसिमरा उपमहानगरपालिका वडा नम्बर २४ को दलित महिला सदस्यमा एमालेकी लालमनि देवी ठाकुर र निजगढ नगरपालिका वडा नम्बर ३ को महिला सदस्य पदमा एमालेकै बुरगाना कुमारी लामा निर्विरोध निर्वाचित भएका हुन् ।
रौतहटको गरुडा नगरपालिका वडा नम्बर ३ को दलित महिला सदस्यमा काँग्रेसकी इन्दु देवी र धनुषाको जनकपुरधाम उपमहानगरपालिका वडा नम्बर ५ को दलित महिला सदस्यमा काँग्रेसकै रिपु कुमारी पनि निर्विरोध निर्वाचित भएका छन् ।
महोत्तरीको बर्दिवास नगरपालिका वडा नम्बर ७ को दलित महिला सदस्यमा माओवादी केन्द्रकी कलीमाया र मनरासिसवा नगरपालिका वडा नम्बर ८ को दलित महिला सदस्यमा लोसपाकी जानकी देवी पनि निर्विरोध निर्वाचत भएको निर्वाचन आयोगले जनाएको छ ।
देशभर ३९० जना निर्विरोध
देशभर भने तीन गाउँपालिका अध्यक्ष सहित ३ सय ९० जना निर्विरोध निर्वाचित भएका छन् ।
३५ हजार २ सय २१ जनप्रतिनिधि छान्नका लागि वैशाख ३० गते चुनाव हुँदैछ । तर गएको ११ र १२ मा परेको उम्मेदवारीका आधारमा निर्वाचन आयोगले तीन अध्यक्ष सहित ३ सय ९० जना निर्विरोध निर्वाचित भएको विवरण सार्वजनिक गरेको छ ।
पालिका चुनावका लागि कुल १ लाख ४५ हजार १० जनाको उम्मेदवारी परेको थियो । आयोगका अनुसार एमालेका १३८, कांग्रेसका ११५, माओवादीका ५९, एकीकृत समाजवादीका ३५, नेमकिपाका २, राप्रपाका २, जसपाका १, लोसपाका १, राष्ट्रिय जनमुक्ति पार्टीका १, नेकपा माओवादी समाजवादीका १ र स्वतन्त्र ३५ जना निर्विरोध निर्वाचित भएका छन् ।पालिका अध्यक्ष ३, उपाध्यक्ष ४, वडाध्यक्ष ४८, दलित महिला सदस्य १६४, महिला सदस्य ७१ र खुला सदस्य १ सय जना निर्विरोध निर्वाचित भएका हुन् । आयोगका अनुसार डोल्पाको काइके गाउँपालिकाको अध्यक्षमा नेकपा एकीकृत समाजवादीका अङ्गदकुमार राना, छार्का ताङसोङ गाउँपालिका अध्यक्षमा एकिर्कत समाजवादीकै सेनाङ गुरुङ र शे–फोक्सुन्डो गाउँपालिकामा एमालेका धावा सम्डुक गुरुङ निर्विरोध निर्वाचित भएका छन् ।
त्यस्तै मनाङको नार्पाभूमि गाउँपालिका उपाध्यक्षमा एमालेका मेङमर फुन्चो लामा, डोल्पाको काइके गाउँपालिकाको उपाध्यक्षमा कांग्रेसका निमा बुढा, छार्का ताङसोङको उपाध्यक्षमा कर्म ढुन्डप गुरुङ र डोल्पोबुद्धको उपाध्यक्षमा एकिकृत समाजवादीका पेम्मा धोर्चे गुरुङ निर्विरोध निर्वाचित भएका छन् ।
प्रदेश–१ मा ४३, मधेस प्रदेशमा ९, वाग्मतीमा ४६, गण्डकीमा ११२, लुम्बिनीमा ८, कर्णालीमा १५७ र सुदूरपश्चिममा १५ जना निर्विरोध निर्वाचित भएको निर्वाचन आयोगले जनाएको छ ।