पर्साको औराहामा गोली चल्यो

क्रान्ति शाह
वीरगन्ज , २२ बैशाख ः पर्साको सखुवा प्रसौनी गाँउपालिका वडा नम्बर १ औराहामा बिहीबार राति गोली चलेको छ ।
औराहा स्थित जंगल छेउ रहेको स्थानीय मंगल बहादुर ब्लोनको घरमा बिहीबार राति ९.३० बजे तिर गोली चलेको हो ।
अज्ञात व्याक्तिले चलाएको गोली , ब्लोनको फुसको घरको भित्ता छेडेर घरभित्र रहेको चामलको बोरामा लागेको प्रहरीले जनाएको छ ।
गोली चलेको खबर पाउन साथ इलाका प्रहरी कार्यालय एकटांगाबाट प्रहरी टोली घटनास्थलमा पुगेको थियो ।
प्रहरी त्यहा पुगेर घटनास्थलको जायजा लिदा ब्लोनको घरको बाँसको टाटी छेडेर गोली घर भित्र रहेको चामलको बोरामा लागेको अवस्था भेटिएको पर्साका प्रहरी नायव उपरिक्षक ओम प्रकाश खनालले जानकारी दिए । चामलको बोरा भित्र कटुवा पेस्तोलको गोली जस्तो फलामको टुक्रा भेटिएको उनले बताए ।
तर गोली कसले र किन चलाएको भन्ने विषयमा केहि खुल्न नसकेको खनालले जानकारी दिए ।
यस बारेमा प्रहरीले अनुसन्धान गरिरहेको उनले बताए ।
यता स्थानीयवासीले भने ब्लोनको घर नजिकै नेपाल सुशासन पार्टीको चुनावी भोज चलिरहेको र नजिकै स्थानीय समुदायको अर्को बैठक चलिरहेका बेला गोली चलेको बताएका छन् । तर कसले र किन गोली चलाएको भन्ने बारे खुल्न नसकेको स्थानीयले पनि बताएका छन् ।
प्रहरीले भने घटनास्थलमा गोली चलेका बेला कुनै पनि भोज , बैठक वा विवाद नभएको बताएको छ ।
गोली लागेका घरको धनी ब्लोन गाँउको सामान्य व्याक्ति रहेको प्रहरीले जनाएको छ ।