काठमाडौं,१२जेठःपर्सा निर्वाचन क्षेत्र नम्बर १ का प्रतिनिधि सभा सदस्य(सांसद) हरि पन्तले आगामी बजेटमा वीरगन्जस्थित नारायणी रंगशाला र नारायणी अस्पताललाई प्राथमिकतामा राख्न माग गरेका छन् ।
प्रतिनिधिसभाको मंगलबारको बैठकमा रास्वपाका सांसद पन्तले समग्र मुलुककै झन्डै आधा राजस्वको भार थेग्ने वीरगन्ज शहर अघिल्ला सरकारहरूबाट सधैं उपेक्षामा पर्दै आएको बताए ।वीरगन्जले सधैं राज्यलाई राजस्व र कर दिन मात्रै अगाडि रहेको स्मरण गराउँदै सांसद पन्तले तर राज्यबाट विकास निर्माणका बजेट पाउन सधैं पछाडि पारिएको बताए ।
उनले भने, ‘सभामुख महोदय यसपालीको बजेटमा दशरथ रंगशाला पछिकै ठूलो वीरगन्जको नारायणी रंगशाला र वीर अस्पतालभन्दा केही वर्ष मात्रै कान्छो नारायणी अस्पताललाई प्राथमिकता दिइयोस् ।’
सांसद पन्तले वीरगन्जस्थित सानोपाइला सहकारीका बचतकर्ताहरूको रकम फिर्ता प्रक्रिया यथाशीघ्र सुरु गर्न पनि सरकारसँग माग गरे ।
गण्डकदेखि वीरगन्ज भन्सारसम्मको करिब ५ किलोमिटर सडक खण्डको दुवै तिर सयौं बर्ष अघि बसेको मुख्य बजारका करिब १ हजार २०० घरहरू डेढ महिना अघि छोटो सूचना र बिना योजना डोजर लगाएर भत्काइँदा त्यहाँ धेरै अन्योलता सिर्जना भएको भन्दै उनले त्यसको समाधान यथाशीघ्र गर्न सरकारसँग माग गरे ।
सांसद पन्तले मेनरोडका सयौं मानिसहरू घरबारविहीन भएको भन्दै उनले वीरगन्जको घटनालाई बागमती किनारको बस्तीको नजरले हेर्न नहुने भन्दै सरकारको ध्यानाकर्षण समेत गराए ।