बारा,२वैशाखः सिमरा–काठमाडौं हवाई रुटमा ६५ प्रतिशत यात्रु घटेका छन् । हवाई इन्धनको मूल्य वृद्धिपछि हवाई भाडा बढेकाले ६५ प्रतिशतसम्म यात्रु घटेका हुन् । दैनिक पाँच उडान हुने सिमरा–काठमाडौं रुटमा दशकौंपछि उडान भर्ने यात्रु ६५ प्रतिशत घटेको नागरिक उड्डयन कार्यालय सिमराले जनाएको छ ।
सिमरा विमानस्थलबाट यसअघि दैनिक ५/६ सय यात्रुहरूको ओहोरदोहोर हुने गरेकोमा अहिले करिब २ सयको हाराहारीमा यात्रु हुने गरेका छन् । इन्धनको मूल्यमा भएको वृद्धिले सिमरा–काठमाडौं रूटमा एक हजार एक सय रुपैयाँ हवाई भाडा बढेको छ । हाल सिमरा–काठमाडौंको भाडा ५ हजार ५५० रुपैयाँ रहेको छ भने काठमाडौं–सिमराको भाडा ५ हजार १५० रुपैयाँ रहेको छ ।
केही साता यता सिमरा–काठमाडौं रुटमा उड्ने बुद्ध एयरका एटिआर ७२ जहाजले पूर्ण क्षमतामा यात्रु बोक्न पाएका छैनन् । बढीमा १५ मिनेट उडान समय रहने काठमाडौंबाट सिमरा विमानस्थलमा आउने विमानहरूले बढीमा २५ जना यात्रु लिएर उत्रने गरेको छ भने फर्कदा सिमराबाट करिब ३० यात्रु लैजाने गरेको निजी विमान कम्पनीहरूले जनाएको छ ।
सिमरा विमानस्थलमा रहेको बुद्ध एयरका कार्यालय प्रमुख सुरेश रेग्मीले पछिल्लो दुई साता यता सिमरा विमानस्थलमा हुने उडान बढीमा ५० प्रतिशतको औसत अकुपेन्सीमा चलिरहेको बताए । त्यसो त जेनजी आन्दोलनपछि अकुपेन्सी घटन सुरु भएको बताउँदै रेग्मीले भने,‘अहिले इन्धनको मूल्य बढ्दै जाँदा भाडा पनि बढेकाले मध्यम वर्गका यात्रुको आकर्षण पुरै घटेको छ ।’
पथलैया–वीरगन्ज औद्योगिक कोरिडोरमा रहेको सिमरा विमानस्थल अत्यधिक रूपमा राजनैतिक नेता–कार्यकर्ता राजनीतिक भेटघाटका लागि दौडधुप बढी गर्ने तथा व्यापार व्यवसायमा संलग्न उद्योगी व्यवसायीले बढी प्रयोग गर्ने विमानस्थलका रूपमा चिनिँदै आएको थियो । अहिले नयाँ सरकार बनेपछि पुराना दलका नेता–कार्यकर्ताको काठमाडौं आवतजावत घटेको छ ।
सिमराबाट काठमाडौँ सडक मार्गमा चार घण्टामा यात्रा गर्न सकिने भएकाले अत्यावश्यक बाहेकका यात्रुलाई हवाई यात्रा गर्नपर्ने बाध्यता नभएकाले पनि महँगो भाडामा यात्रुको आकर्षण घटने गरेको ट्राभल एजेन्टहरू बताउँछन् । चुरीयामाई ट्राभल्स सिमराका रोहित साहले भाडा बढेपछि प्लेन टिकट काट्ने यात्रु घटेको बताए । पहिले आफूले नियमित टिकट काट्ने गरेका विमानका यात्रुहरूले समेत सडक मार्ग प्रयोग गर्न थालेपछि विमान चढ्ने यात्रु घटेको उनले बताए ।
बारा, पर्सा, रौतहट र मकवानपुरको हेटौंडासम्मका यात्रुहरूले सेवा लिँदै आएका सिमरा विमानस्थलमा एटीआर ७२ जहाजमार्फत बुद्ध एयरले दैनिक पाँच वटा उडान गर्ने गरेपनि यति एयर, श्री एयरलाइन्स, सौर्य एयरलाइन्स र नेपाल एयरलाइन्सले सेवा बन्द गरिसकेका छन् ।प्रकाश लम्साल /कारोबार