वीरगन्ज,२५ मंसिरः आगामी फागुन २१ गते हुने भनिएको प्रतिनिधि सभा सदस्य निर्वाचनका लागि अशोक राई नेतृत्वको जनता समाजवादी पार्टी (जसपा) ले पर्सा जिल्लाको चार वटै निर्वाचन क्षेत्रबाट उम्मेदवारहरुको नाम सिफारिस गरेको छ ।
जसअनुसार पर्सा क्षेत्र नम्बर ४ बाट प्रत्यक्षतर्फको उम्मेदवारमा तबरेज अहमदको एकल नाम सिफारिस गरिएको छ । बिहीबार वीरगन्जमा बसेको जिल्ला कार्य समितिको बैठकले अहमदको एकल नाम सर्वसम्मतले सिफारिस गरेको हो ।अहमद, भूमी समस्या समाधान आयोग पर्साका अध्यक्षपनि हुन् ।
पहिलो मधेस आन्दोलनदेखि नै वीरगन्जमा युवाहरुको अगुवाई गर्दै सकृय सहभागिता जनाउँदै आएका अहमद पार्टीको पूर्वजिल्ला सचिवपनि हुन् ।
जसपाले उक्त क्षेत्रबाट समानुपातिकतर्फ रम्भा यादवको नाम पनि एकल सिफारिस गरेको छ । वीरगन्जको होटल पूजनमा जसपा पर्साका अध्यक्ष सिंहासन सा कलवारको अध्यक्षता तथा पूर्वमन्त्री प्रदीप यादवको प्रमुख आतिथ्यता र वीरगन्ज महानगरका मेयरसमेत रहेका पार्टीका केन्द्रिय सदस्य राजेशमान सिंहको विशिेष उपस्थितीमा बसेको बैठकमा केन्द्रिय सदस्य पुरुषोत्तमलाल झा, पूर्व प्रदेश सभा सदस्य जन्नत अन्सारी लगायतकाकोपनि सहभागिता थियो ।