वीरगन्ज,११मंसिर: वीरगन्ज महानगरपालिकाकाे कार्यालयले चालु आर्थिक वर्षको चार महिनामा २१ करोड तीन लाख ९६ हजार ४०८ रुपैयाँ राजस्व संकलन गरेको छ । महानगरले गत साउनदेखि कात्तिकसम्मकाे अवधिमै सम्पत्ति करतर्फ ७ करोड ५६ लाख रुपैयाँ संकलन गरेको छ ।
महानगरले चालु आवको चार महिनामा भूमिगत-मालपोत करतर्फ ३७ लाख ६७ हजार ९८० राजस्व संकलन गरेको छ । त्यस्तै घरवहाल करतर्फ भने रु एक करोड ६० लाख ८६ हजार रकम उठाएको छ । त्यस्तै पूर्वाधार सेवाको उपयोगमा लाग्ने करतर्फ भने दुई करोड राजस्व संकलन गरेको छ ।
महानगरले अखेटोपहारमा लाग्ने करतर्फ भने पाँच करोड १० लाख राजस्व संकलन गरेको छ । अन्य सेवा शुल्कतर्फ भने रु एक करोड ४९ लाख ८३ हजार राजस्व संकलन गरेको छ । महानगरले विभिन्न २० शीर्षकमा कर उठाउने गर्छ ।
वीरगन्ज महानगरका मेयर राजेशमान सिंहले महानगरले राजस्व संकलन बढाउनेतर्फ जनचेतना अभिवृद्धि गर्दै आइरहेको दावी गरे ‘महानगरको राजस्व अभिवृद्धि गर्नका लागि जनचेतनामूलक कार्यक्रम गर्दै आइरहेका छौँ । यद्यपि अहिले पनि अपेक्षाकृत ढङ्गले राजस्व भने संकलन हुन सकिरहेको छैन,’उनले भने, “यहाँका जनतामा स्थानीय सरकारलाई कर तिर्नुपर्छ भन्ने जागरणको अभावको कारणले पनि समस्या भइरहेको छ ।’