काठमाडौं,५असाेज:अन्तरिम सरकारकी प्रधानमन्त्री सुशीला कार्कीले आइतबार ५ जना मन्त्री थप गर्दै मन्त्रीपरिषद विस्तार गरेकी छन् ।
आइतबार साँझ बसेको मन्त्रिपरिषद् बैठकले स्वास्थ्य तथा जनसंख्या मन्त्रीमा डा. संगीता काैशल मिश्र,सञ्चार तथा सूचना प्रविधिमन्त्रीमा जगदीश खरेल, भूमि व्यवस्था, सहकारी तथा गरिबी निवारण र उद्योग वाणिज्य तथा आपूर्ती मन्त्रीमा अनिलकुमार सिन्हा,शिक्षा ,विज्ञान तथा प्रविधिमन्त्रीमा महावीर पुन र कृषिमन्त्रीमा मदन परियारकाे नाम राष्ट्रपतिसमक्ष सिफारिस गर्ने निर्णय गरेकाे हाे ।
स्वास्थ्यमन्त्री बन्ने भएपछिल स्वास्थ्य मन्त्रालयको अतिरिक्त सचिव रहेकी डा. मिश्रले आइतबार मात्रै राजीनामा दिएकी थिइन् ।
यस्तै सञ्चारमन्त्रीमा सिफारिस खरेल इमेज टिभीका समाचार प्रमुख थिए ।दुई दशक भन्दा बढी समयदेखि पत्रकारिता गरिरहेका खरेलले त्रिभूवन विश्वविद्यालयबाट पत्रकारिता तथा आमसञ्चारमा स्नातकोत्तर गरेका छन् ।
सर्वोच्च अदालतका पूर्वन्यायाधीश सिन्हालाई दुई वटा मन्त्रालयको जिम्मेवारी सम्हाल्नेगरी मन्त्रीमा सिफारिस गरिएकाे हाे ।
आइतबार सिफारिस गरिएका पाँचै जनाले साेमबार मन्त्री पदकाे शपथ लिने भएका छन्।
प्रधानमन्त्री कार्कीले यसअघि गृहमन्त्रीमा ओमप्रकाश अर्याल,अर्थमन्त्रीमा रामेश्वर खनाल र उर्जामन्त्रीमा कुलमान घिसिङलाई नियुक्त गरिसकेकी छन्।