सिमरा,३१भदौंः बाराको सुवर्ण गाउँपालिका –३ पतगछियाका तीन जनाको सोमबार राति मृत्यु भएको छ । मृत्यु हुनेमा करिब ४५ वर्षीय गोपाल यादव,३० वर्षीय रविशंकर यादव र ४० वर्षीय अजमुल मियाँ रहेका छन् ।
गोपालको स्थानीय अस्पतालमा र अन्य दुईको भारतको मोतिहारीस्थित अस्पतालमा मृत्यु भएको जिल्ला प्रहरी कार्यालय बाराका प्रहरी प्रवक्ता तथा प्रहरी नायब उपरीक्षक विजयराज पण्डितले जानकारी दिए । उनीहरूको मृत्युको कारण खुल्न सकेको छैन ।
स्थानीयलाई उद्धृत गर्दै प्रहरीले जनाएअनुसार तीन जनाले भदौ २९ गते एकै ठाउँमा बसेर मदिरा सेवन गरेका थिए । मदिरा सेवन गरेको भोलिपल्ट तीनैजना बिरामी परेको र उपचारका लागि अस्पताल गएको स्थानीयले प्रहरीलाई जानकारी गराएका छन् ।
स्थानीयका अनुसार बिरामीमध्ये गोपाल गाउँकै अस्पताल र अन्य दुई भारत मोतिहारीस्थित अस्पतालमा उपचारका लागि गएका थिए । उपचारका क्रममा केही घण्टाको फरकमा तीनैजनाको मृत्यु भएको हो । तीनै जनाको मृत्यु भएपछि विषाक्त मदिरा वा खाना सेवन गरेको हुनसक्ने आशंका प्रहरीले गरेको छ ।
मृतकको शव दाहसंस्कार गरिसकिएको छ। गोपाल र रविशंकरको पतगछिया र अजमुलको भारतमै दाहसंस्कार गरिएको हो । दाहसंस्कारपछि मात्रै घटनाको बारेमा प्रहरीलाई जानकारी गराएपछि अनुसन्धान जटिल बनेको छ । घटनाको अनुसन्धान गर्न जिल्ला प्रहरी कार्यालय बाराले प्रहरी टोली खटाएको छ ।साभारःअन्नपूर्णपोष्ट