वीरगन्ज,२जेठ:”दृष्टिविहीनका लागि दृष्टि” भन्ने नाराका साथ वीरगन्ज महानगरपालिकाको सहकार्यमा तेरापंथ युवक परिषद् वीरगन्जले जनजागृत अभियान सञ्चालन गरेको छ।
मृत्यु पश्चात् आँखादानको महत्वबारे जनमानसमा चेतना फैलाउने उदेश्यले उक्त अभियान सञ्चालन गरिएको हाे। “कसैको अन्धकारमा उज्यालो बन्नुहोस्” भन्ने सन्देश बोकेको यो अभियानले वीरगन्जबासीलाई आँखादानजस्तो महान कार्यप्रति प्रेरित गरिरहेको छ।
शुक्रबार आयाेजित कार्यक्रममा वीरगन्ज महानगरपालिकाका मेयर राजेशमान सिंहले आँखादानजस्तो मानवीय कार्यमा महानगरको साथ रहेको उल्लेख गरे।उनले भने भने,
“आँखादान केवल एक सामाजिक कार्य होइन, यो मानवीय कर्तव्य हो। हामी सबै मिलेर यस्तो अभियानलाई सफल बनाउनु पर्छ, ताकि मृत्युपछि पनि हाम्रो योगदान कसैको जीवन उज्यालो बनाउन सकोस्। वीरगन्ज महानगरपालिका सदैव यस्ता जनहितका प्रयासमा अगाडि रहनेछ।”
कार्यक्रममा सहभागी वीरगन्ज महानगरपालिकाका जनप्रतिनिधि तथा कर्मचारीहरुलाई आँखा दान सम्बन्धमा जनमानसमा रहेका भ्रम तथा यथार्थका बारेमा जानकारी दिइएको थियो ।
आयोजक संस्था तेरापंथ युवक परिषद् वीरगन्जका अनुसार, आँखादानको विषयमा अझै पनि समाजमा अपर्याप्त जानकारी र भ्रम विद्यमान छन्। यस अभियानमार्फत नागरिकलाई आँखादानको प्रक्रियाबारे सही जानकारी दिनुका साथै, मृत्युपछि कसरी आफ्ना आँखा कसैको जीवनमा प्रकाश बन्न सक्छ भन्नेबारे जागरूक गराउने गरिएको छ।
कार्यक्रममा परिषद्का प्रतिनिधि राजु वैदले परिषद्ले सेवा, संस्कार र संगठनको त्रिआयामी उद्देश्यसहित कार्य गरिरहेको भन्दै आँखा दान कार्यक्रमलाई प्राथमिकतामा राखेर काम गरिरहेको बताए ।
कार्यक्रममा उद्योगी अशोक वैद, महानगरपालिकाका जनप्रतिनिधी, विभिन्न शाखा महाशाखाका प्रतिनिधि, समाजसेवी तथा युवाहरूको उल्लेखनीय सहभागिता रहेको थियो।