वीरगन्ज,११कार्तिकःदिपावलीको अवसर पारेर वीरगन्जमा पुनः ‘रात्रि बजार’ सञ्चालन गरिने भएको छ । वीरगन्ज महानगरपालिकाले दिपावलीलाई लक्षित गरेर आदर्शनगर चोकदेखि पुरानो बसपार्कसम्म भोलि (सोमबार)देखि ‘रात्रि बजार’ सञ्चालन गर्ने तयारी गरेको हो ।
भोलिदेखि बिहीबार लक्ष्मीपूजाको दिनसम्म दिपावली लक्षित रात्रि बजार सञ्चालन गर्न लागिएको वीरगन्ज महानगरका मेयर राजेशमान सिंहले जानकारी दिए । वीरगन्जको अर्थतन्त्र चलायमान बनाउन र अबेरसम्म बजार सञ्चालन हुने वातावरण बनाउन रात्रि बजारले भूमिका निर्वाह गर्ने उनको विश्वास छ ।
वीरगन्ज महानगरपालिका र ग्रीन सिटी सामुदायिक प्रहरी सेवा केन्द्रको संयुक्त आयोजनामा हुन लागेको रात्रि बजारमा खानाका विशेष परिकार, लत्ताकपडा, कस्मेटिक, भाडाँकुडा लगायतका सरसामानका स्टलहरु राखिनेछ ।
यसका साथै नेपाली सांस्कृतिक परम्परा झल्कने झाँकीको प्रस्तुतीका साथै दिपावली र छठ पर्वको शुभकामना आदानप्रदान कार्यक्रमसमेत आयोजना हुने मेयर सिंहका जनसम्पर्क सल्लाहकार नवराज फुयाँलले जानकारी दिए।