वीरगन्ज,९कार्तिकः वर्षाको पानीको निकास बन्द हुदाँ डुबानमा परेका वीरगन्जका तीन वटा वडाका ५० बिघा भन्दा बढी धान खेतको पानीको निकास खोलिएपछि पिडित किसानहरु खुशी भएका छन् ।
गत असोज ११ र १२ गते अविरल परेको वर्षाका पानीको निकास नहुदाँ वीरगन्ज महानगरपालिका वडा नम्बर २०, २४ र २६ मा पर्ने सुगौलीविर्ता, हरपतगन्ज र बहुअरी गाँउको धानबाली डुबानमा परेको थियो ।वीरगन्ज महानगरपालिकाका मेयर राजेशमान सिंहको पटक पटकको प्रयासपछि डुबानमा परेको क्षेत्रको पानीको निकास बिहीबारदेखि पूर्ण रुपमा खोलेपछि ती तीनवटै वडाका किसानहरु खुशी भएका हुन् ।
कार्तिक १ गते मेयर सिंह, प्रमुख जिल्ला अधिकारी दिनेश सागर भुसाल सहितको टोलीले डुबान क्षेत्रको स्थलगत अवलोकन गरेपछि डुबानको पानी निकासका लागि पहिलेदेखि नै रहेको बन्द ह्युमपाइप खुलाएर र पुरिएर रहेको पहिलेको नहर पुनः चालु गराउनका लागि त्यहिदिनदेखि महानगरपालिकाले ३ वटा जेसीबीसहितको टोली परिचालन गरेको थियो । करिब एक हप्ताको निरन्तर प्रयासपछि बिहीबारदेखि डुबान क्षेत्रमा जमेको पानीको निकास पूर्ण रुपमा खोलिएपछि डुबानले चिन्तामा परेका किसानहरु खुशी भएका हुन् ।
बहुअरीका स्थानीय रामशशंकर द्विवेदीले भने,‘झण्डै एक महिनादेखि हाम्रो धानबाली डुबानमा परेको थियो । पाकेर काट्न तयार भइसकेको धान पानीको डुबानमा परेकाले सम्भव नै थिएन । अब भने पानीको निकास भइरहेको छ । अब छिट्टै बाली भित्रयाउँछौ । महानगरका मेयर सिंहको प्रयास र पहलले आँफुहरु बाली बिग्रनबाट जोगिएको उनले बताए ।
बहुअरीकै अर्का किसान वीरेन्द्र द्धिवेदीले पनि पानीको निकास खोलिएपछि अब खेतबाट बाली घरमा सहजै भित्र्याउन सकिने बताए ।उनले भने,‘ यो डुबानको समस्याले हामी वर्षौदेखि पिडित थियौं । यसपाली त झन् धेरै वर्षा हुदाँ पुरै धानखेत जलमग्न थियो । केहिदिन अझ ढिला भएको भए साारा धानबााली खेतमै गलेर नष्ट हुन्थ्यो । किसानको मर्कालाई बुझेर निकास खोलिदिएकोमा मेयर साबलाई धेरै धेरै धन्यवाद ।’
गत असोज ११ र १२ गते दुई दिनसम्म परेको अविरल वर्षाका कारण वीरगन्ज महानगरपालिकाको वडा नम्बर २०, २४ र २६ का अधिकांश क्षेत्र डुबानमा परेको थियो ।ती तीनवटै वडाको पानीको निकास वडा नम्बर १७ अलौँस्थित आईसीपीचोकबाट हुने गरेको थियो । पहिलेदेखि बर्षाको पानी उक्त स्थानमा राखिएका दुईवटा ह्युमपाइपबाट निकास हुँदै आएकामा यसपटक ह्युमपाइप जाम भएकाले सुगौलीविर्ता, हरपतगन्ज र बहुअरी गाँउ र त्यहाँका खेत डुबानमा परेका थिए ।
विगतमा नहरको क्यानल र दुईवटा ह्युमपाइपबाट खेतको पानीलाई निकास दिने गरेकामा अहिले क्यानल पुरेर पक्की सडक निर्माण गर्नुका साथै र ह्युमपाइप जाम भएकाले वीरगन्ज वडा नम्बर २६ सुगौलीविर्ता, वडा २० हरपतगन्ज र वडा २४ बहुअरीको पानीले निकास पाउन सकेको थिएन ।
गत असोज १८ गते महानगरको जेसीबीद्वारा ह्युमपाइपको जाम हटाएर पानीको निकास गराइएको थियो । तर, त्यहिदिन साँझ वडा नंम्बर १७ स्थित अलौँवासीले अर्काे वडाबाट आएको पानीले आफ्नो घर र खेत डुबानमा पारेको भन्दै ह्युमपाइप पुरिदिँदै पानी निकास ठप्प पारेका थिए । नगर प्रहरीको सहयोगमा वडा सदस्य आमोद यादवलगायतको टोलीले पुनः ह्युमपाइपको जाम खोल्न खोज्दा विवाद भएको थियो ।वीरगन्ज–१७ अलौँ निवासी सुदर्शन लामिछानेले वडा सदस्य यादवलाई दुव्र्यहार गरेपछि कुटाकुटसमेत भएको थियो ।
तर डुबानमा परेका अन्य तीन वटै वडाका स्थानीयको गुनासो आएपछि गत असोज २१ गते महानगरका मेयर सिंह महानगरको प्राविधिक र नगर प्रहरी सहितको टोली लिएर निरीक्षणमा जाँदा समेत विवाद भएको थियो ।