वीरगन्ज,२२भदाैं:विघ्नहर्ता भगवान् गणेशको पूजा आराधना गरी आज(शनिबार ) गणेश चतुर्थी व्रत मनाइँदै छ ।
सत्ययुगमा भाद्र शुक्ल चतुर्थीका दिन भगवान् गणेशको जन्म भएको शास्त्रीय मान्यता छ । यस अवसरमा देशभरका गणेश मन्दिरमा विशेष पूजा गरी गणेशको जन्मोत्सव मनाउने गरिन्छ ।
शिव पार्वतीका पुत्र गणेशलाई जुनसुकै धार्मिक कर्ममा अग्र पूजाको अधिकार प्राप्त छ ।हरितालिका (तीज) को व्रत पारायण गरी गणेशको व्रत गर्ने शास्त्रीय मान्यता रहेको छ ।
भाद्र शुक्ल तृतीयाका दिन सुखद दाम्पत्य जीवन तथा सुखशान्तिको कामना गरेका ब्रतालुले चतुर्थीका दिन जीवनमा विघ्न नआओस् भनी कामना गर्न गणेश पूजा गर्ने विधान गणेश पुराणमा उल्लेख छ ।
यसैबिच वीरगन्ज महानगरपालिका वडा नम्बर १० घडिअर्वामा आजदेखि गणेश चतुर्थी महाेत्सव सुरु भएकाे छ ।
घडीअर्वास्थित रामजानकी मन्दिर परिसरमा सजाइएकाे आकर्षक टेण्टपण्डालमा भगवान् गणेशकाे मुर्ति स्थापना गरी पूजापाठ गरेर गणेश चतुर्थी महाेत्सव शुभारम्भ गरिएको हाे ।गणेश भगवानकाे मुर्ति अगाडि १५१ किलाेकाे लड्डुपनि राखिएको छ ।
जय गणेश झन्कार मण्डल परिवार र जय गणेश पूजा सञ्चालक समितिकाे संयुक्त आयाेजनामा सुरु गरिएको गणेश चतुर्थी महाेत्सवमा ५ दिनसम्म बेलुकी सन्ध्या आरति,महाप्रसाद वितरण ,अखण्ड ज्याेति, भजनकिर्तन र धार्मिक सांस्कृतिक कार्यक्रम आयाेजना गरिने महाेत्सव आयाेजक समितिका अध्यक्ष मदन प्रसाद कलवारले जानकारी दिए ।उनका अनुसार,धार्मिक सांस्कृतिक कार्यमका लागि भारतकाे काेलकता,माेतीहारीका कलाकारहरुलाई बाेलाइएकाे छ।