काठमाडौ,६जेष्ठ:स्वास्थ्य तथा जनसङ्ख्या मन्त्री प्रदीप यादवले पर्साको पोखरिया नगरपालिकास्थित पोखरिया अस्पताललाई प्रादेशिक अस्पतालका रूपमा स्तरोन्नति गर्ने प्रतिबद्धता व्यक्त गरेका छन् ।
पर्सा जिल्लाको दोस्रो सदरमुकामका रूपमा परिचित पोखरियास्थित अस्पताललाई मन्त्री यादवले स्थानीयहरूको आग्रहअनुसार प्रादेशिक अस्पतालका रूपमा स्तरोन्नति गर्ने प्रतिबद्धता व्यक्त गरेका हुन् ।
पूर्व प्रतिनिधिसभा सदस्य हरिनारायण रौनियारलगायतका स्थानीयहरूले आइतबार मन्त्री यादवसँग मन्त्रालयमा भेट गरेर पोखरिया अस्पताललाई प्रादेशिक अस्पतालका रूपमा स्तरोन्नति गर्दै पूर्वाधार विकास गर्नेदेखि सुविधाहरू थप गर्न आग्रह गरेका थिए ।
त्यहि आग्रहअनुसार मन्त्री यादवले पोखरिया अस्पताल स्तरोन्नति गर्ने काम अगाडि बढाउन मातहतका कार्यालय र निकायहरूलाई निर्देशन दिएको उनका उप-स्वकीय सचिव निखिल बर्णवालले जानकारी दिए ।
निर्देशन दिँदै मन्त्री यादवले भने – ‘गृह जिल्लास्थित पोखरिया अस्पताल स्तरोन्नति हुनुपर्छ भन्ने मेरो सुरुदेखिको लक्ष्य हो । यसका लागि समय – समयमा मैले पहल पनि गरेकै थिएँ । अब स्वास्थ्य मन्त्रालयको जिम्मेवारी सम्हालेसँगै यो कामलाई अगाडि बढाउने निर्देशन दिएको छु । छिट्टै काम सुरु हुन्छ ।’
बर्णवालका अनुसार स्वास्थ्यमन्त्री यादवले पर्सा जिल्लाका अन्य अस्पताल तथा स्वास्थ्य संस्थाहरूको पनि स्तरोन्नति गरिने बताए ।
भेटघाटका क्रममा पूर्व मन्त्री एवं जनता समाजवादी पार्टीकी सह – अध्यक्ष रेणु यादवको पनि उपस्थिति रहेको थियो ।