काठमाडौं,२माघः रुसी सेनामा भर्ती भएका थप एक जना नेपालीको मृत्यु भएको छ ।लमजुङ दूधपोखरी गाउँपालिका वडा नम्बर १ घर भएका ३२ वर्षीय साजन गुरूङको मृत्यु भएको गाँउपालिका पालिकाका सूचना अधिकारी रमण बरालले जानकारी दिए ।
रोजगारीका लागि रुसी सेनामा पुगेका गुरुङको मृत्यु भएको खबर पाँच दिन अघिमात्र परिवारलाई प्राप्त भएको उनले बताए ।
उनका अनुसार मृतक गुरुङसँगै रुसी सेनामा पुगेका साथीहरुले उनका भाइ कुमार गुरुङलाई उक्त खबर पठाएका थिए । जर्मनीमा रहेका भाइ कुमारले दाइको मृत्युको खबर घर पठाएपछि परिवारले पुस २९ गते क्रियाकर्म समेत गरिसकेको छ ।
गुरुङ रोजगारीका लागि भन्दै साढे तीन महिना अघि रुसी सेनामा पुगेका थिए । उनको घरमा बुबा, आमा, श्रीमती र एक छोरा छन् ।
गुरुङको मृत्यु बारे नेपालको परराष्ट्र मन्त्रालयले भने अझैसम्म पुष्टि गरेको छैन।