वीरगन्ज,२९ भदौं : राष्ट्रिय भूमि आयोगले पर्साका जिल्लाका ११ वटा पालिकाका भूमिहीन दलित, सुकुम्बासी र अव्यवस्थित बसोबासीलाई जग्गा उपलब्ध गराउन लगत संकलन थालेको छ ।
आयोगले शुक्रबार सूचना निकालेर सम्बन्धित पालिकाका वडाका तोकिएका ठाउँमा खटिएका लगत संकलकमार्फत् निवेदन आह्वान गरेको हो । शुक्रबारदेखि ३५ दिनभित्र निवेदन दिइसक्नु पर्ने सूचनामा भनिएको छ ।
पर्सा जिल्लको पोखरिया र बहुदरमाई नगरपालिका ,सखुवाप्रसौनी,बिन्दवासिनी ,कालिकामाई ,जगरनाथपुर, छिपहरमाई, धोबिनी ,पटेर्वा सुगौली , जिराभवानी र पकाहामैनपूर गाउँपालिकामा निवेदन दिन आयोगको आग्रह छ ।
यस्तै बारामा आदर्श कोतवाल गाउँपालिका, प्रसौनी गाउँपालिका, रौतहटमा पहोरा नगरपालिका, देवाही गोनाही नगरपालिका, फतुवा विजयपुर नगरपालिका, मौलापुर नगरपालिका, इशानाथ नगरपालिका, बौधीमाई नगरपालिका र राजपुर नगरपालिकामा निवेदन दिन सकिने आयोगले जनाएको छ ।
आयोगका अनुसार यसअघि लगत संकलन थालिएका पालिकाहरुमा छुटेका भूमिहीन दलित, सुकुम्बासी र अव्यवस्थित बसोबासीले पनि ३५ दिनभित्र निवेदन दिन सक्नेछन् ।