वीरगन्ज, ४ साउन : बारा २ को उपनिर्वाचनमा जसपा अध्यक्ष उपपेन्द्र यादवविरुद्ध चुनाव लडेका शिवचन्द्र कुशवाहालाई जनमत पार्टीले साधरण सदस्य समेत नरहने गरी कारबाही गरेको छ ।
जनमत पार्टीले विधान, नीति तथा निर्देशनविपरीत काम गरेको भन्दै कुशवाहासहित पाँच जना नेतालाई कारबाही गरेको हो ।
जनमत पार्टीको केन्द्रीय अनुशासन समितिले नेताहरू शिवचन्द्र कुशवाहा, गुलाब मण्डल, शंकर खड्का, भोपेन्द्र यादव र भगवान दास यादवलाई कारबाही गरेको हो । उनीहरूलाई पार्टीको अनुशासनविपरीत काम गरेकाले कारबाही गरिएको पार्टीका राष्ट्रिय उपाध्यक्ष दीपककुमार साहले विज्ञप्तिमार्फत् जनाएका छन् ।
कारबाहीमा परेकामध्ये कुशवाहा बारा–२ को उपनिर्वाचनमा जसपा अध्यक्ष उपेन्द्र यादव विरुद्ध चुनाव लडेका थिए । उनलाई जनमत पार्टीले साधारणसदस्य समेत नरहनेगरी कारबाही गरेको हो । कुशवाहामाथि अनुशासनहीन काम गरेको र नेतृत्वविरुद्ध लागेको आरोप छ । उनलाई चुनावको मुखमा उपेन्द्रविरुद्ध लडाउन सीके राउतले जनमत पार्टीमा भित्रयाएका थिए ।
यस्तै सप्तरीका मण्डल र खड्कालाई १ वर्षका लागि निलम्बन गरिएको छ । यसैगरि केन्द्रीय निर्देशनको उल्लंघन गरेको र गर्न लगाएको तथा गुटबन्धी गरेको भन्दै रुपन्देहीका भोपेन्द्र यादवलाई केन्द्रीय सचिवालयबाट ३ महिनाका लागि निलम्बन गरिएको छ ।
यस्तै कपिलवस्तु घर भएका भगवान दास यादव पार्टीको सदस्यबाट एक वर्षका लागि निलम्बनमा परेका छन् ।
