मधेसखबर
वीरगन्ज,११असार : देशका ६ वटै महानगरले शुक्रबार आगामी आर्थिक वर्ष २०७९/०८० का लागि बजेट सार्वजनिक गरेका छन् । ६ वटै महानगर मध्ये सबै भन्दा कम बजेट वीरगन्ज महानगरको रहेको छ । सबै भन्दा बढि बजेट काठमाण्डौ महानगरको रहेको छ ।
मधेस प्रदेशको एक मात्र वीरगन्ज महानगरपालिकाले अगामी आर्थिक वर्ष २०७९/०८० का लागि ३ अर्ब ३३ करोड ६३ लाख २६ हजार रुपैयाँको अनुमानित बजेट ल्याएको छ ।शुक्रबार सम्पन्न वीरगन्ज महानगरपालिकाको ११औँ नगर सभाको अधिवेशनमा उपमेयर इम्तियाज आलमले ३ अर्ब ३३ करोड ६३ लाख २६ हजार रुपैयाँको बजेट प्रस्तुत गरेका हुन् ।प्रस्तुत बजेटमा चालूतर्फ २ अर्ब ६ करोड ९८ लाख ५० हजार र पुँजीगततर्फ एक अर्ब २६ करोड ६४ लाख ७५ हजार रुपैयाँ विनियोजन गरिएको छ ।
काठमाडौं महानगरपालिकाले आगामी आर्थिक वर्षका लागि कुल २५ अर्ब ४१ करोड ९६ लाख ९६ हजार रुपैयाँको बजेट ल्याएको छ ।शुक्रबार आयोजित नगरसभामा काठमाण्डौ महानगरपालिकाले आर्थिक वर्ष २०७९/०८० का लागि कुल २५ अर्ब ४१ करोड ९६ लाख ९६ हजार अनुमानित बजेट तथा कार्यक्रम सार्वजनिक गरेको हो ।
यस्तै ललितपुर महानगरपालिकाले आगामी आर्थिक वर्ष २०७९/०८० लागि ६ अर्ब, ३५ करोड तीन हजारको बजेट विनियोजन गरेको छ ।
नकेपा माओवादी केन्द्रका अध्यक्ष पुष्पकमल दाहालकी छोरी रेणु दाहाल मेयर रहेको चितवनको भरतपुर महानगरपालिकाले भने आगामी आर्थिक वर्षका लागि वीरगन्ज महानगरको भन्दा झण्डै साढे २ अर्बले बढि अर्थात ५ अर्ब ७४ करोड ४२ लाख ५६ हजार रुपैयाको बजेट ल्याएको छ ।
प्रदेश १ को एक मात्र महानगर विराटनगर महानगरपालिकाको आगामी आर्थिक वर्षको बजेट ३ अर्ब ६२ करोड ५५ लाख ६७ हजार बराबरको रहेकोे छ ।