काठमाडौं,४बैशाखः राष्ट्रिय स्वतन्त्र पार्टी(रास्वपा)की सहमहामन्त्री सुमना श्रेष्ठले पदबाट राजीनामा दिएकी छिन् ।प्रतिनिधी सभा सदस्यसमेत रहेकी श्रेष्ठले पार्टीमा एक व्यक्ति एक पद लागू गर्नुपर्ने भन्दै सहमहामन्त्री पदबाट राजीनामा दिएकी हुन् ।
रास्वपाका कार्यवाहक प्रवक्ता मनिष झाले सहमहामन्त्री श्रेष्ठले राजीनामा दिएको जानकारी दिए । संसदीय मोर्चामा नै सक्रियताका साथ लाग्ने भनेर श्रेष्ठले राजीनामा दिएकी तर स्वीकार भने भइननसकेको पार्टीले जनाएको छ ।
पछिल्लोपटक सभापति रवि लामिछानेले पार्टी पुनर्संरचना गर्ने भन्दै त्यसका लागि नेताहरूलाई तयार रहन भनेका थिए ।त्यही बेलादेखि श्रेष्ठले आफू पदबाट राजीनामा दिन र कानुन निर्माणमा क्रियाशील हुने बताउँदै आएकी थिइन् ।
श्रेष्ठले सभापति लामिछानेलाई १५ दिनअघि नै राजीनामा बुझाएकी थिइन् । तर, लामिछाने सहकारी ठगीमा उच्च अदालतको आदेशबाट पक्राउ परेपछि श्रेष्ठको राजीनामाबारे थप कारबाही भएको थिएन ।
श्रेष्ठले आफ्नो राजीनामाबारे पार्टीका नेताहरूलाई भनेकी छन्, ‘रविजी सभापतिको रुपमा फर्कनु भएलगत्तै मेरो उहाँसँग योबारे कुरा भएको हो र मैले राजीनामाको पत्र पनि बुझाएकी हुँ । रविजीले पनि पार्टीलाई पुनर्संरचना गर्छु भन्ने विचार अघि सार्नुभएको र त्यो कुरा मेरो नेतृत्व विकासको अवधारणासँग मिलेको हुँदा मैले पदबाट राजीनामा दिएकी हुँ । रविजीले पनि यसलाई सकारात्मक रुपमा लिनुभएको थियो,’ श्रेष्ठले भनेकी छन्, ‘यसपछि एक सांसद्को जिम्मेवारी अझ सशक्त रुपमा निभाउन सक्छु भन्ने मेरो ठम्याई छ ।’