काठमाडौं,२१असारःअर्जेन्टिना कोपा अमेरिका २०२४ को सेमिफाइनलमा प्रवेश गरेको छ ।शुक्रबार बिहान भएको अत्यन्त रोमाञ्चाक खेलमा इक्वेडरलाई टाइब्रेकरमा ४–२ ले पराजित गर्दै साविक विजेता अर्जेन्टिनाले सेमिफाइनलमा स्थान पक्का गरेको हो ।
टाइब्रेकरमा अर्जेन्टिनाका कप्तान लिओनल मेसीले पेनाल्टी मिस् गरेका थिए । तर गोलरक्षक एमिलियानो मार्टिनेजले इक्वेडरको दुई पेनाल्टी बचाएपछि अर्जेन्टिना विजयी बनेको हो ।
त्यसअघि निर्धारित ९० मिनेटको खेल १–१ को बराबरीमा सकिएपछि खेलको नतिजा सिधै टाइब्रेकरबाट भएको हो ।
९० मिनेटको खेलमा ३५औ मिनेटमा लिसान्ड्रो मार्टिनेजले गोल गर्दै अर्जेन्टिनालाई अग्रता दिलाएका थिए । दोस्रो हाफमा इक्वेडरले बराबरी गर्ने अवसर पाएपनि गोल गर्न सकेन । ६१औं मिनेटमा इनर भ्यालेन्सियाले पेनाल्टीमा गोल गर्न सकेनन् । उनको प्रहार पोष्टमा लागेर फर्किएको थियो ।
अर्जेन्टिनाका रोड्रिगो डे पउलले पेनाल्टी एरियामा बल ह्यान्ड गरेपछि इक्वेडरले पेनाल्टी पाएको थियो । तर गोल गर्न असफल रह्यो । तर इक्वेडरले इन्जुरी टाइममा बराबरी गोल फर्काएको थियो । इक्वेडरका केभिन रोड्रिगेजले बराबरी गोल गरेका थिए ।
अर्जेन्टिनाले अब भेनेजुएला र क्यानडा बीचको विजेतासँग सेमिफाइनलमा खेल्नेछ ।