बारा,७चैत : बाराका किसानहरुले मंगलबार कलैया उपमहानगरपालिकाको कार्यालय घेराउ गरेका छन्। करिब एक सयको संख्यामा रहेका किसानहरुले मंगलबार बिहान ११ बजेदेखि उपमहानगरपालिकाको कार्यालय घेराउ गरेका हुन् ।
कलैया बजारमा तरकारी बेच्नका लागि सेड उपलब्ध गराउन र उपमहानगरपालिकाले जफत गरेको तरकारीको क्षतिपूर्तिको माग गर्दै किसानहरुले मंगलबार उपमहानगरपालिका कार्यालय घेराउ गरेका हुन्।
कलैया बजारमा किसानले बेच्न ल्याएका तरकारी उपमहानगरपालिकाको नगर प्रहरीले जफत गर्ने गरेको छ । जफत गरिएका तरकारी सडेर बिग्रिने गरेको छ । सेड नपाएर आफूहरुले कलैया बजारमा बेच्न राखेको हरियो सागसब्जी र तरकारी नगर प्रहरीले नियन्त्रणमा लिएर उपमहानगरमा राख्दा कुहिएकाले उचित क्षतिपूर्ति दिनु पर्ने कलैया उपमहानगरपालिका–८ का किसान रोहित चौरसियाले बताए ।
नगर प्रहरीले गएको चैत ३ गते करिब ५० जनाभन्दा बढी किसानको तरकारी नियन्त्रणमा लिएको थियो । कलैयाको खप्परताता, विश्वम्भरपुर, शीतलपुर, बरेवा लगायत गाउँका किसानहरूले मंगलबार उपमहानगरपालिकाको कार्यालय घेराउ गरेका हुन्।