माधुुरी महत्तो
वीरगन्ज,१०जेठःमधेस प्रदेशको एक मात्र महानगर वीरगन्ज महानगरपालिकाको मेयरमा ,सत्तारुढ पाच दलीय गठबन्धनबाट जनता समाजवादी पार्टी (जसपा) का उम्मेदवार राजेशमान सिंह विजयी भएका छन् ।
नेकपा एमालेका उम्मेदवार एंव निवर्तमान मेयर विजय कुमार सरावगीलाइ २२ हजार ५ सय ४४ मतको फराकिलो अन्तरले पराजित गर्दै राजेशमान मेयरमा निर्वाचित भएका हुन् ।
को हुन् राजेशमान ?
२०७४ को निर्वाचनमा पनि वीरगन्ज महानगरको मेयरमा राजेशमान सिंह र विजय कुमार सरावगी दुवैले दुइ मधेसवादी दलको उम्मेदरवार बनेर मेयरमा प्रतिस्पर्धा गरेका थिए ।
त्यसबेला तत्कालीन संघीय समाजवादी फोरम (अहिलेको जसपा) बाट चुनाव लडेका सरावगी , १९ हजार ३ सय ९३ मतका साथ मेयरमा निर्वाचित भएका थिए ।
तत्कालीन राजपा (अहिलेको लोसपा) बाट उम्मेदवार बनेका राजेशमान भने १२ हजार १ सय ६५ मत का साथ तेश्रो स्थानमा सिमित भएका थिए ।
यसपालि भने दुवै जनाले दल परिवर्तन गरेर मेयरमा उम्मेदवारी दिएकोमा बाजी भने राजेशमानले मारेका छन् ।
वीरगन्ज महानगरको मेयरमा नवनिर्वाचित राजेशमानले २०४३ सालमा नेपाली काँग्रेसको भातृसंगठनबाट नेविसंघबाट राजनीतिक यात्रा शुरु गरेका थिए ।
२०५४ सालमा भएको स्थानिय निकायको निर्वाचनमा उनि काँग्रेसको तर्फबाट वडा सदस्य (तत्कालीन नगरपरिषद सदस्य) मा निर्वाचित पनि भएका थिए । त्यसपछि काँग्र्रेससंगको नाता तोड्दै राप्रपा निकट भएका राजेशमान २०६३ सालको मधेस आन्दोलन देखि भने मधेस केन्द्रित दलमा आबद्ध भएका थिए ।
मधेस आन्दोलन ताका देखि नै राजेशमान , लोसपाका अहिलेका नेता शरतसिंह भण्डारी निकट थिए ।
भण्डारी नेतृत्वको तत्कालीन राष्ट्रिय मधेस समाजवादी पार्टी (रासप) को महासचिव पनि उनि भए ।
२०७४ सालमा मधेस केन्द्रित रामसपा, तमलोपा , सदभावना सहितका ६ दलले एकता गरेर राजपा गठन गरेपछि राजेशमान राजपाको पनि महामन्त्री बनेका थिए ।
२०७४ को स्थानीय तहको निर्वाचनमा राजपाबाटै उनि महानगरको मेयरमा लडेका थिए तर तेश्रो स्थानमा रही पराजित भए ।
२०७६ साल मा महन्थ ठाकुर नेतृत्वको तत्कालीन राजपा र उपेन्द्र यादव नेतृत्वको तत्कालीन संघीय समाजवादी फोरम पार्टी बिच एकता भएर जसपा बन्यो ।
तर २०७८ जेठ तिर जसपा विभाजन भएपछि महन्थ ठाकुरको नेतृत्वमा बनेको लोसपालाइ राजेशमानले रोजे ।
बैशाख ३० मा निर्वाचन हुने भएपछि राजेशमानले पनि दल परिवर्तन गर्ने मनशाय बनाए ।
निवर्तमान मेयर सरावगी काँग्रेसमा जाने तरखर गरिरहेका बेला राजेशमानको रोजाइमा भने एमाले थियो ।
माघ २७ गते उनले काठमाण्डौ पुगेर केपी ओलीलाइ भेटेर एमाले प्रवेश गर्ने वाचा पनि दिए ।
काठमाण्डौबाट फर्किएरु माघ २८ गते वीरगन्जमा पत्रकार सम्मेलन गरेर राजेशमानले आफु एमालेमा प्रवेश गरेको घोषणा गर्दै चैत ८ गते वीरगन्जमा हुने ओलीको कार्यक्रममा औपचारिक रुपमा एमाले प्रवेश गर्ने उद्घोष पनि गरे ।
तर यहि बिचमा गत फागुन २८ गते अचानक निवर्तमान मेयर सरावगी एमालेमा प्रवेश गरेपछि रुष्ट बनेका राजेशमान मेयरको उम्मेदवार बनाउनु पर्ने शर्तमा चैत ७ गते जसपामा प्रवेश गरे । वीरगन्जमा चैत ७ मा आयोजित जसपाको पार्टी प्रवेश कार्यक्रममै जसपा अध्क्ष उपेन्द्र यादवले सिंहलाइ मेयरको उम्मेदवार बनाउने वाचा गरेका थिए ।
अध्यक्ष यादवको त्यहि वाचा पुरा गर्दै जसपाले वीरगन्ज महानगरको उम्मेदवार राजेशमानलाइ नै बनायो र अन्तत उनले मेयरमा बाजी पनि मारेका छन् ।