वीरगन्ज,१८ भदौं :भारतको मुम्बईमा बालश्रममा संलग्न रहेका तथा हराएर पुगेका ६ जना बालकलाई उद्धार गरी नेपाल ल्याइएको छ।
राष्ट्रिय बाल अधिकार परिषद्, संरक्षण नेपाल र बाल हेल्पलाइन १०९८ बाराको समन्वय तथा सहकार्यमा ती बालकहरूको उद्धार गरिएको हो। उद्धार गरिएका ६ बालकमध्ये ४ जना बालश्रममा संलग्न रहेका र २ जना हराएर मुम्बई पुगेका थिए।
उद्धार गरिएका बालकहरूमध्ये रौतहटको परोहा नगरपालिकाका २ जना, इशनाथ नगरपालिकाका २ जना, बृन्दावन नगरपालिकाका १ जना र गुजरा नगरपालिकाका १ जना रहेका छन्। उनीहरू १३ देखि १७ वर्ष उमेर समूहका रहेको संरक्षण नेपालले जनाएको छ।
भारतबाट नेपाल ल्याइएका बालकहरूलाई आवश्यक प्रक्रिया पूरा गरी उनिहरुका अभिभावकको जिम्मा लगाएर घर पठाइएको छ।