जनकपुरधाम,१४ साउनः जिल्ला प्रशासन कार्यालय धनुषाले जिल्लाका ३ वटा पालिकामा कफ्र्यु आदेश जारी गरेको छ ।
जनकपुर उपमहानगरपालिकाका सबै वडा, लक्ष्मीनिया गाउँपालिका र नगराइन नगरपालिकामा कफ्र्यु आदेश जारी गरिएको प्रमुख जिल्ला अधिकारी प्रेमप्रसाद लुइँटेलले जानकारी दिए ।बिहीबार दिउँसो ३ः३० बजेदेखि अर्को आदेश जारी नहुन्जेलसम्मको लागि कफ्र्यु आदेश जारी गरिएको छ ।
सुनसरी घटनालाई लिएर जनकपुर र आसपासको क्षेत्रमा बिहीबार बिहानैदेखि प्रदर्शन उग्र बनेपछि जिल्ला प्रशासन कार्यालय धनुषाले कफ्र्यु आदेश जारी गरेको हो ।
यस्तै जिल्ला प्रशासन कार्यालय सिरहाले पनि कफ्र्यु आदेश जारी गरेको छ। प्रमुख जिल्ला अधिकारी सुरेन्द्र पौडेलका अनुसार दिउँसो २ बजेदेखि अर्को आदेश नहुन्जेलसम्का लागि कफ्र्यु आदेश जारी गरिएको हो।
प्रशासनले पूर्व–पश्चिम राजमार्गको पूर्वतर्फ गोलबजार नगरपालिका वडा नम्बर ३ को कसहा खोलादेखि पश्चिमतर्फ गोलबजार नगरपालिकाकोे चोहर्वा चोक, उत्तरतर्फको गोलबजार वडा नम्बर–६ को सैनिक चोकदेखि दक्षिणतर्फ, गोलबजार वडा नम्बर ४ को रा.प्र. रा. प्र. बहुमुखि क्याम्पस वरिपरिको क्षेत्रमा कफ्र्यु आदेश जारी गरेको हो।
प्रमुख जिल्ला अधिकारी पौडेलले कफ्र्यू आदेशको पालना गरी जिल्लाको समग्र शान्ति सुव्यवस्थालाई सामान्यीकरण गर्न अपील गरेका छन्।