काठमाडौं,२१ असारः ब्राजिलका स्टार फरवार्ड नेयमार पूर्ण रूपमा फिट भएका छन्। उनले फिफा विश्वकप २०२६ अन्तर्गत नर्वेविरुद्धको अन्तिम–१६ को खेलमा पूरा ९० मिनेट खेल्न सक्ने संकेत दिएका छन्।
चोटका कारण केही समय मैदानबाहिर रहेका नेयमारले पछिल्ला प्रशिक्षण सत्रमा उत्कृष्ट प्रदर्शन गरेपछि मुख्य प्रशिक्षक कार्लो आन्सेलोटीले सोमबार बिहान हुने नर्वेविरुद्धको खेलमा उनलाई सुरुआती टोलीमा उतार्ने तयारी गरेका छन्। नेयमारले रियल म्याड्रिडका विङ्गर भिनिसियस जुनियरसँगै आक्रमणको नेतृत्व गर्ने अपेक्षा गरिएको छ।
ब्राजिलका लागि नेयमारको पुनरागमनलाई ठूलो राहतका रूपमा हेरिएको छ। अनुभव र सिर्जनात्मक खेलका कारण उनी टोलीका प्रमुख खेलाडीमध्ये एक हुन्। भिनिसियस, रोड्रिगो र अन्य आक्रमणकारी खेलाडीसँगको उनको संयोजनले ब्राजिलको आक्रमण अझ प्रभावकारी बन्ने विश्वास गरिएको छ।
विश्वकपको उपाधि लक्ष्य बनाएको ब्राजिलले नर्वेविरुद्ध जित निकाल्दै क्वार्टरफाइनलमा स्थान बनाउने लक्ष्य राखेको छ।